A Xunta declara Ben de Interese Cultural a Ofrenda do Antigo Reino de Galicia

A Xunta de Galicia aprobou este luns o decreto que declara Ben de Interese Cultural (BIC) a Ofrenda do Antigo Reino de Galicia, que se celebrará este domingo en Lugo, ao considerar acreditado o seu "valor singular como patrimonio inmaterial do pobo galego".

Segundo trasladou o conselleiro de Presidencia, Xustiza e Deportes, Diego Calvo, na rolda de prensa posterior á reunión semanal do Goberno galego --que presidiu el en substitución do seu titular, Alfonso Rueda, ao participar nun acto no Porto--, isto suporá a aplicación do réxime de tutela da Lei de Patrimonio Cultural, e por tanto o "maior nivel de protección".

Calvo explicou que a declaración chega tras recibir os informes favorables do catro órganos aos que se lles solicitou: o Consello da Cultura Galega, o museo do Pobo Galego, o Instituto de Estudos Galegos Pai Sarmiento e a Facultade de Humanidades da Universidade de Santiago de Compostela.

Desta maneira, a Consellería de Cultura, Lingua e Xuventude culmina a tramitación iniciada en 2024 para darlle esta distinción a unha tradición que se celebra en Lugo desde fai máis de tres séculos de forma ininterrompida, excepto no ano 1809 por estar a cidade en poder dos franceses.

Así, o decreto recoñécelle á Ofrenda do Antigo Reino de Galicia ser un "caso singular dentro da cultura e o patrimonio inmaterial" da Comunidade ao expor "de forma única unha tradición secular dos galegos, así como a "evolución da súa unidade como pobo".

Segundo o conselleiro, a declaración BIC da Ofrenda trae consigo "varias recomendacións para garantir a protección e transmisión desta cerimonia única" destacando que se debe "incrementar o volume de investigacións e rexistrar e sistematizar os documentos relacionados co patrimonio".

O alcalde de Ourense, Gonzalo Pérez Jácome, e a ex alcaldesa de Lugo, Lara Méndez, xunto a outros alcaldes durante a ofrenda do Antigo Reino de Galicia ao Santísimo Sacramento | Fonte: Carlos Castro - Europa Press