Por Galicia Confidencial | | 05/02/2013 | Actualizada ás 17:29
O Comité de Empresa da TVG denunciou por parte dos actuais dirixentes da televisión pública da manipulación que padecen os informativos da canle pública e alertaron sobre as presións e as intervencións sobre o seu traballo que están a recibir a cotío os e as profesionais do medio.
Non é a primeira vez que os representantes dos traballadores denuncian “inxerencias” do poder político do PPdeG no ente público, pero, nesta ocasión, apuntan o problema “agravouse” nos últimos meses por mor dos diversos casos de corrupción política que están a sair á luz pública, como por exemplo o Caso Pokemon ou, nos últimos días, o chamado Caso Bárcenas.
Casos “penosos e vergoñentos”
O Comité da TVG considera “especialmente penosas e vergoñentas” estas prácticas de manipulación da televisión pública no actual contexto de grave crise económica e profundo deterioramento político e social, “xusto cando unha cidadanía en gran parte empobrecida e indignada esixe máis que nunca o seu dereito de acceso a unha información veraz, plural e obxectiva”, apunta nun comunicado.
Ademais, denuncia a ausencia dun mecanismo que evite as presións coas que teñen que traballar cada día os profesionais e que garanta a liberdade e a indepencia no exercicio dos seus labores informativos.
Estatuto profesional
Por iso, pide a “creación inmediata” do Estatuto Profesional que contempla a Lei 9/2011, de 9 de novembro, dos medios públicos de comunicación audiovisual de Galicia. Este instrumento , segundo a mesma lei indica, está “destinado a fortalecer a calidade, profesionalidade e independencia dos contidos informativos”.
A Lei dos medios públicos que o Parlamento galego aprobou en decembro de 2011 obriga tamén a crear un Consello de Informativos, como órgano interno de participación dos profesionais da información da Corporación RTVG, que terá como obxectivos “velar pola independencia, pola veracidade e pola obxectividade dos contidos informativos difundidos por todas as súas canles”.
Velaquí algúns exemplos da cobertura dos telexornais sobre os casos de presunta corrupción Gürtel e Pokemon nos últimos días
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.