O rexeitamento a Feijóo inunda Santiago de paneis publicitarios: "grazas por pechar escolas e hospitais"

O rexeitamento ó candidato do PP á Xunta de Galicia, Alberto Núñez Feijóo, toma forma nunha campaña popular a escasos días da cita coas urnas. As rúas de Santiago de Compostela amenceron este xoves cos seus paneis publicitarios ateigados de mensaxes que vencellan ó presidente 'popular' con empresas como Mercadona, Ence, Endesa ou La Voz de Galicia.

A campaña, disposta ao longo da capital galega -inclusive nos arredores da sede da Xunta de Galicia, no barrio de San Caetano- recolle uns 'agracementos' que pon en boca das empresas nomeadas. Así, no caso de Mercadona, o texto do cartel é: "gracias por deixarnos mercar o leite a 0'30€ o litro ós produtores para logo vendelo por 1'30€". No caso de ENCE apuntan "grazas por pechar escolas e medios do rural para substituílo todo por plantacións de eucaliptos".

Na mesma liña, a campaña -en principio, non vencellada a partido algún- fai fincapé nas subvencións recibidas por La Voz de Galicia -á que sitúan á par da consigna "grazas por doar ós medios de prensa dous millóns de euros un mes antes das eleccións"- e a eléctrica Endesa, que 'agradece' ó presidente 'popular' que lle permita "seguir enchendo todo de eólicos" á vez que "estafa ós galegos na factura da luz".

Esta campaña coincide tamén con outra nas redes activada hai semanas baixo o lema Byebyefeijóo. O seu obxectivo é denunciar a xestión política de Feijóo nos seus 11 anos de goberno á fronte da Xunta de Galicia. Baixo cancelos como #byebyefeijóo, #enonvolvas, #atéaquífeijóo, #feijóomalxestor ou #stopfeijóo, esta iniciativa popular busca visibilizar a realidade galega que deixan as políticas do PPdeG “que converten Galicia nunha terra queimada que precisa un cambio urxente”, sinalan na presentación da campaña.