Por E.P. | MADRID | 11/07/2020 | Actualizada ás 11:11
Vox interpuxo unha querela, ante o Xulgado de Instrución de Madrid, contra o presidente de Correos, Juan Manuel Serrano, e o secretario xeral, Julio González, polo que consideran que foi un "secuestro" da propaganda electoral do partido para as eleccións vascas e galegas por parte da empresa postal.
A formación de Santiago Abascal denunciou este mesmo venres ante a Xunta Electoral que a súa propaganda electoral non estaba a chegar a algúns lugares. Tras isto, Vox decidiu querelarse contra os altos cargos da empresa postal porque entenden que se "secuestrou" a propaganda que este partido depositou en Correos para o seu envío inmediato aos electores galegos e vascos. "Estes sobres electorais incluían frases e datos relativos a estatísticas e feitos que foran publicados tanto por fontes oficiais como polos medios de comunicación", defende Vox.
No escrito remitido ao Xulgado de Instrución, a vicesecretaria xurídica de Vox, Marta Castro, explica que o "secuestro dos sobres realizouse sen seguir o procedemento establecido" porque, segundo sostén, Correos non solicitara previamente a autorización xudicial legalmente necesaria.
Así mesmo, lembra que os querelados, por vontade propia, "ordenaron e executaron a paralización do envío electoral ata a resolución da Xunta Electoral", o que, ao seu xuízo, causou un "importante atraso" na repartición da propaganda electoral por parte dos responsables da entidade que tiña que proceder á súa distribución.
Esta formación denuncia tamén que o "secuestro foi disfrazado como unha consulta", cando "non se apreciaba elemento infractor algún no texto dos sobres". De feito, segundo o partido, o responsable que tomou a decisión de paralizar o envío dos sobres "era coñecedor de que se solicitaba a autorización preceptiva que contén a Lei ao Xulgado, este non llo ía a conceder" e, é por iso, explica o escrito, "procedeu por iniciativa propia".
Así, Vox solicita que se interrogue aos querelados e que se tomen como testemuñas aos responsables das delegacións de Correos nas provincias da convocatoria electoral.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.