Por Europa Press / Redacción | Santiago de Compostela | 18/09/2020 | Actualizada ás 12:54
Outras dúas mortes en hospitais galegos, unha ligada ao brote da residencia DomusVi de Outeiro de Rei (Lugo), elevou a 707 as vítimas mortais en Galicia diagnosticadas con covid-19 desde o arranque da pandemia.
En concreto, as autoridades sanitarias galegas informaron de que perderon a vida unha muller de 92 anos que estaba ingresada no Hospital Lucus Augusti (HULA) e un home de 84 hospitalizado no Complexo Hospitalario Universitario de Ourense (CHUO).
Ambos os dous tiñan patoloxías previas e a muller que faleceu no HULA procedía do xeriátrico de Outeiro, que suma un total de once vítimas.
Galicia superou na pasada xornada os 700 falecidos con covid-19. Xa este venres pola mañá, Sanidade informou da morte de dous octoxenarios en Lugo e A Coruña, dous falecementos aos que agora se suman os notificados pola tarde.
88 FALECIDOS NA 'NOVA NORMALIDADE'
Desde o comezo da 'nova normalidade', o número de pacientes falecidos coa enfermidade en Galicia é de 88, tras a morte dunha muller o 7 de agosto.
Antes diso, Galicia encadeara case dous meses --desde o 10 de xuño-- sen decesos relacionados co coronavirus.
O maior balance de falecidos dos últimos meses notificouse o pasado mércores, cando Sanidade informou dun total de sete. A última vez que se superou esta cifra foi o pasado 5 de maio, con nove decesos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.