Por Galicia Confidencial | SANTIAGO DE COMPOSTELA | 13/10/2020 | Actualizada ás 22:20
Novo episodio dun acontecemento ambiental que ameaza con prolongarse. Mentres os habitantes de Pontedeume seguen ser poder beber ou cociñar coa auga que baixa do Encoro do Eume, Galicia Confidencial vén de recuperar unhas declaracións da compañía Endesa que poñen en dúbida o seu papel nos vertidos que hoxe ameazan o ecosistema do Eume.
Tal e como publicou GC, hai apenas unhas semanas diversas asociacións ecoloxistas cargaban contra a compañía polas "vergoñas" das súas explotacións no entorno ao longo do século XX. En concreto, as plataformas destacan que a baixada no nivel da auga deixara ao descuberto un vertedoiro en pleno parque natural.
A historia, lonxe de rematar neste punto, colleu forza cando o concello de Pontedeume anunciou que prohibía o consumo de auga da traída por superar esta o nivel de turbidez máximo establecido. Esta circunstancia debíase ó estado do propio encoro do Eume, do que se nutre a rede pública de auga da contorna.
"CALIDADE ACREDITADA"
Neste aspecto, cómpre destacar que, tan só catro días antes do peche por parte do Concello, a compañía asegurou á axencia EFE que a "calidade da auga" do Eume estaba "acreditada por laboratorios alleos e da Xunta". Do mesmo xeito, a empresa subliñaba que non existían "sedimentos perigosos" ou tóxicos no río.
O anuncio da prohibición por parte do consistorio vén de levantar as críticas de asociacións ecoloxistas ante o "silencio" das administracións durante días. En particular, o chamado Colectivo Terra vén de cargar contra o "desleixamento" das autoridades tras anunciar que desenvolverán un estudo privado dos lodos do encoro "na procura de metais pesados".
8 de outubro. A empresa que suministra o serviço de augas a Pontedeume diz que as análises de auga potable som corretas. pic.twitter.com/J3OzdSTIqn
— Colectivo Terra (@colectivo_terra) October 12, 2020
Vimos denunciando o estado das augas do Eume. Nengumha administraçom fixo nada nestas semanas. Esta manhá o @dePontedeume anuncia a proibiçom do consumo de auga depois de dias de silêncio e dizer q nom existia problema para o seu consumo. Nom se pode jogar coa saúde das vizinhas.
— Colectivo Terra (@colectivo_terra) October 10, 2020
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.