Gonzalo Caballero móstrase a favor do toque de queda e carga contra Feijóo por rexeitalo
Critica ó presidente por querer "frear" a actividade nocturna pero non aplicar os "instrumentos legais dispoñibles".
Por E.P. | SANTIAGO DE COMPOSTELA | 23/10/2020 | Actualizada ás 13:16
O secretario xeral do PSdeG, Gonzalo Caballero, pediu este venres ao presidente da Xunta, Alberto Núñez Feijóo, que "asuma" que, para "frear a actividade social entre as 0:00 e as 6:00 horas", deben aplicarse os "instrumentos legais dispoñibles", que implican "estado de alarma ou toque de queda".
En declaracións aos medios tras manter unha reunión en Vigo con representantes da Asociación de Industrias do Metal e Tecnoloxías Asociadas (ASIME), Gonzalo Caballero expresou que os socialistas "non entenden ao presidente cando di que convén frear a actividade social polas noites, sen asumilo, porque o instrumento legal implica estado de alarma ou toque de queda".
A ese respecto, o líder do PSdeG apuntou que "se os expertos recomendan frear a actividade social de 0:00 a 6:00 horas, hai que facelo cos instrumentos xurídicos dispoñibles", en alusión á manifestación de Feijóo, que avalou impor restricións nese horario pero pediu non falar de toque de queda ou estado de alarma, polo "custo reputacional" que suporía.
Gonzalo Caballero instou ao presidente da Xunta a "colaborar" co Goberno central e co Ministerio de Sanidade, "no canto de buscar a volta de porca", e apostou por aplicar as medidas que sexan convenientes para protexer a saúde "máis aló de buscar o conflito".
O secretario xeral do PSdeG advertiu de que os datos da epidemia nesta segunda onda son "preocupantes", e deben tomarse medidas compatibles con manter a actividade económica, aínda que "priorizando a saúde". "Hai que defender a saúde por encima de todo, sen que a Xunta busque sempre o conflito", proclamou, e lembrou o "cinismo" e "inconsistencia" do discurso do presidente galego, que durante a primeira onda da pandemia "criticou o estado de alarma", e agora "recoñece que hai que tomar medidas complexas, que restrinxen dereitos".
