Por Europa Press / Redacción | SANTIAGO DE COMPOSTELA | 16/11/2020 | Actualizada ás 12:57
Calquera novo plan, programa ou proxecto que leve a cabo en Galicia e que afecte o territorio deberá ter en conta valores paisaxísticos en todas as súas fases, desde o deseño ata a execución, a partir de 2021.
Así o destacou a conselleira de Medio Ambiente, Ángeles Vázquez, na presentación das principais liñas do "texto definitivo" das directrices da paisaxe, que este luns a Xunta remitirá ao consello asesor da paisaxe para que este emita un informe para o que ten de prazo ata o 16 de decembro. Despois, a intención é levar este documento ao Consello e a responsable autonómica en materia de Medio Ambiente espera empezar o ano que vén coas directrices aprobadas.
"É innegable a importancia desta ferramenta para avanzar no recoñecemento xurídico das paisaxes que fan que Galicia sexa única. Permitirá, por unha banda, a integración e a súa consideración en todas as políticas territoriais e sectoriais, e, por outro, preservar o carácter dos distintos tipos de paisaxe, protexer os elementos de maior valor e mellorar aquelas que poidan sufrir un tipo de impacto", destacou Ángeles Vázquez en rolda de prensa.
Entre outros proxectos, as directrices, que non terán efecto retroactivo, afectarán a parques eólicos, minas, instalacións enerxéticas e plantación de especies vexetais, co ánimo de "procurar o menor impacto visual" de todos eles e para respectar as áreas de "especial interese". O plan eólico, así como outros, deberán ser revisados para introducilas e "haberá limitacións e prohibicións igual que pasará coas canteiras e as minas en canto a áreas de especial interese paisaxístico".
En concreto preguntada por este plan, o que ordena o desenvolvemento dos parques eólicos da comunidade, Vázquez sinalou que "terminaba en 2020" e "cando se faga a redacción" da súa revisión por parte da consellería competente "teñen que estar incluídas" estas directrices, pois son dun "rango superior".
As directrices "pechan" o corpus normativo e supoñen "un paso adiante moi importante no camiño iniciado hai máis dunha década para protexer a paisaxe", subliñou a conselleira.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.