Inspección de Traballo detecta "irregularidades" da Xunta en prevención laboral en colexios ante a pandemia

Inspección de Traballo identificou diferentes "irregularidades" e "deficiencias" cometidas pola Consellería de Educación na protección da saúde dos traballadores en colexios fronte á pandemia.

Nun escrito con data do 2 de novembro, tras denuncias formuladas pola CIG, Inspección de Traballo formula varios avisos á Consellería de Educación relativos a cuestións como: falta de actualización de medidas a protocolos polo covid, ausencia de identificación de tarefas de maior risco, insuficiente adaptación de persoal vulnerable aos postos de traballo que procedan, así como "incongruencias" sobre os EPI (equipos de protección individual) a empregar con persoas con síntomas compatibles de covid.

Ademais, insta a que se dea cumprimento de medidas sobre limpeza e formación, á vez que se respecten "escrupulosamente" os dereitos de consulta e participación dos representantes dos traballadores.

De tal forma, Inspección de Traballo chama á Xunta á "subsanación das irregularidades constatadas" e cita á Consellería de Educación o próximo 16 de decembro para que xustifique as correccións realizadas.

DEFICIENCIAS

Entre outras cuestións, neste requirimento de 11 páxinas constátase que "non resulta acreditado" que "a totalidade do persoal docente e non docente que presta os seus servizos en centros de ensino non universitarios dependentes da Conselleria recibise a formación pertinente".

E é que Educación tan só trasladou que houbo cursos con 3.430 inscritos dos denominados grupos covid, así como un webinar cun milleiro participantes.

A Consellería de Educación explica a Inspección de Traballo que contratou á empresa Cualtis para que faga a avaliación específica da exposición á covid nos centros, "ante a imposibilidade de asumir dita labor cos medios humanos e materiais existentes no servizo de prevención propio da Xunta de Galicia".

Así, Inspección de Traballo observa que o "contido é idéntico" nas avaliacións sobre centros realizada por Cualtis con independencia dos centros educativos --máis aló de cambiar o número de aulas--, polo que non se recollen as particularidades de cada un.

Xunto a isto, a inspectora advirte de "contradicións" entre o protocolo para centros e as "recomendacións das autoridades sanitarias e protocolos elaborados para outros ámbitos laborais".

FALTA DE ANÁLISE DE RISCOS

Unha das cuestións sobre as que fai fincapé este informe é que "resulta necesaria unha maior concreción sobre aqueles escenarios de exposición" dos traballadores "nos que ao incrementarse o nivel de risco existente, faise preciso o emprego dos EPI".

De feito, tras solicitar aclaración, a Consellería "indica que descoñece se os EPI están ou non a disposición dos traballadores" e xustifícao "en virtude do principio de autonomía de cada centro". Tamén di Educación que "descoñece" as adaptacións dos postos de traballo de persoas vulnerables polo mesmo motivo, á vez que informa de que se encargou a Cualtis que avalíe "850 casos como máximo" neste campo.

Sobre este extremo, Inspección de Traballo deixa claro que "non é responsabilidade de cada un dos centros se non do servizo de prevención" da Consellería, tras a emisión do correspondente informe médico, "o proceder a elaborar a necesaria adaptación do posto de traballo".

Pon de exemplo un centro de Noia para referirse a a "incerteza sobre a verdadeira exposición á que se atopan sometidos os traballadores do centro".

SEN MÁSCARAS FFP2

Tamén se fai mención á "contradición" entre o uso de máscara cirúrxica ou de FFP2 para o acompañamento a alumnos sospeitosos de covid a zonas de illamento.

É máis, no informe déixase constancia de que a Xunta non entregou documentación de facer entrega a centros de máscaras FFP2 nin tampouco cirúrxicas. O Goberno galego tan só achega un contrato de 400.000 máscaras de tipo hixiénicas reutilizables, "procedéndose á repartición de 67.650 máscaras hixiénicas aos 33.825 traballadores".

"En ningún sitio se etablecre as características técnicas de bata desechable (estariamos ante un epi) e nin se menciona a mesma nas avaliacións específicas", engade.

"Nada se di sobre a protección do coidador que debe atender o alumno, sen gardar as distancias, por tempos superiores aos 15 minutos previstos como contacto estreito e en espazos pechados, por tanto con risco de exposición a aerosois no caso de posible alumno asintomático ou presintomático", expón.

Noutra orde de cousas, Educación achega un documento no que "pon de manifesto que a necesidade de reforzo das tarefas de limpeza que esixe o protocolo covid non leva obrigatoriamente a necesidade de máis persoal, senón de reforzar a limpeza de determinados elementos". No entanto, procédese ao reforzo do persoal de limpeza de 77 centros.

Respecto deste punto, a inspectora pide que se aclare e se acheguen máis datos sobre a xustificación da suficiencia de persoal de limpeza nun contexto de pandemia.

A CIG CARGA CONTRA O "DEIXAMENTO" DA XUNTA

Pola súa banda, os secretarios de CIG Ensino e Administración, Suso Bermello e Zeltia Burgos, cargaron contra o "deixamento" do Goberno galego para protexer os 40.000 empregados de persoal educativo e non educativo nos centros. Esperan que de aquí ao 16 de decembro haxa un "cambio radical" por parte da Xunta, pois pola contra non se van quedar "parados".

Bermello valora que esta resolución "certifica" todas as denuncias formuladas pola CIG respecto de que "non hai servizos de protección que merezan tal nome" na Consellería de Educación, que ten que recorrer a Cualtis para que faga un "curta e pega".

Reprocha que a Xunta é "a administración que máis incumpre a lei de prevención de riscos", "máis que empresas privadas", o que tacha de "vergoñoso". Lamenta que unha organización sindical teña que denunciar o que sucede para que o Goberno galego "faga o mínimo e indispensable" en materia laboral.

Tamén recrimina que "se ninguneou por completo" por parte da Xunta ás organizacións sindicais nesta materia.

Ademais, este sindicalista afea á Xunta que "pretendeu lavarse as mans" ao botar culpas cara ás direccións dos centros e sen aceptar as súas responsabilidades sobre as "confusións" no uso de máscaras. "Non se atenderon para nada as cuestións de saúde e protección dos traballadores", sentenza.

Nesta liña, Zeltia Burgos incide na "omisión clarísima" do deber da Consellería na súa "responsabilidade de empregador" á hora de proporcionar os EPI ou dar formación. A CIG pon o foco sobre que a Xunta non achegou documentación sobre a compra de FFP2, "obviamente, porque non existe".

Finalmente, máis aló do informe, a CIG mostrou a súa queixa de que Galicia sexa unha das dúas únicas comunidades que non achegan datos dos contaxios en centros desagregados entre alumnos, profesores e persoal non docente, de forma que se impide "investigar se se está actuando mal" e "non se ten capacidade correctora".