A Xunta cifra en 26 millóns o impacto do recorte de cotas de pesca para 2021

A Xunta de Galicia cifrou nuns 26 millóns de euros o impacto que terá na economía galega o recorte nas cotas de pesca para 2021 fixado no Consello de Ministros de Pesca da Unión Europea (UE). Así o sinalou o presidente do Executivo autonómico, Alberto Núñez Feijóo, na rolda de prensa posterior ao Consello, que analizou un informe da Consellería do Mar que cuantifica o impacto que terán os recortes nos totais admisibles de captura (TAC) e cotas aprobados a semana pasada.

Respecto diso, incidiu en que a frota galega perde un 7,6% de cota con respecto ao ano 2020 e asegurou que o sector galego é o "máis castigado" dos que faenan con Cantábrico-Noroeste ao sufrir unha perda de 11 millóns de euros de forma directa e de 63% das capturas.

O documento sinala, ademais, que o segmento máis afectado polo acordo de Bruxelas é o arrastre de litoral, que perdería no caso de Galicia uns ingresos de case 7,5 millóns de euros, seguido das artes menores, cunha incidencia de máis de 3 millóns.

Á marxe das repercusións directas das reducións de cotas, Feijóo referiuse tamén ás consecuencias que xera sobre os salarios dos traballadores do sector, e sobre os sectores indirectos no conxunto da economía. Así, apuntou que uns 2.300 tripulantes da frota galega do Cantábrico-Noroeste verán reducido o seu soldo, perdendo 1.700 euros ao ano, uns 4 millóns en total.

"Non entendemos esta situación e parécenos que é un grave erro", manifestou para engadir que a comunidade achegou distintos informes nos que se garante a viabilidade de manter as cotas do ano 2020. Ademais, tamén fixo fincapé na "preocupación manifesta" do brexit.