A Xunta di que a poboación de máis de 80 anos estará vacinada en maio “no escenario máis pesimista”

Todos os maiores de 80 anos que viven en Galicia poderían estar vacinados a principios de maio. Esa é a previsión da Xunta en función das vacinas xa comprometidas por Pfizer e sen ter en conta a chegada de novas unidades doutras compañías, como a de Moderna. “Este é o escenario máis pesimista”, dixo o presidente galego apuntando que se chegan novas vacinas os prazos poden ser acurtados.

Na rolda de prensa posterior ao Consello da Xunta, Feijóo insistiu en que Galicia debería recibir o 8,2% das vacinas para os maiores de 80 anos, “xa que esa é a porcentaxe desa poboación que temos do conxunto estatal”, dixo.  E esta poboación, que é a segunda prioritaria en vacinarse, comezará a facelo en febreiro para estar “inmunizda” en maio.

“A ver se na terceira semana de febreiro comezamos a primeira dose para rematala en marzo e que todos estean vacinados xa en maio. Este é o escenario máis pesimista porque agardamos máis vacinas”, dixo Feijóo.

RESTO DE GRUPOS PRIORITARIOS

Por outra banda, ademais dos maiores de 80 anos, neste segundo grupo prioritario estaría o resto de profesionais sanitarios non prioritarios, os profesionais e usuarios de centros de día e o persoal de axuda no fogar. Todos eles deberían estar inmunizados en maio segundo as previsións da Xunta.

Feijóo destacou que a partir do 8 de febreiro comezarán as primeiras doses do resto do persoal sanitario non prioritario e sobre mediados de febreiro serían os profesionais e usuarios de centros de día e o persoal de axuda no fogar.

Antes, o 9 de febreiro terían que estar inmunizadas case todas as residencias, un 90%, agaś nas que hai focos activos. Tamén o 15 de febreiro deberían recibir a súa segunda dose os 21.000 profesionais sanitarios considerados prioritarios.