O Sergas anuncia 1.200 prazas no proxecto de decreto de emprego público para persoal estatutario de 2021
Os tribunais para as convocatorias en marcha de facultativos especialistas e técnicos sanitarios constituiranse este mes
Por E.P. | SANTIAGO DE COMPOSTELA | 06/03/2021 | Actualizada ás 18:50
O Sergas presentou aos sindicatos CIG, CC.OO., CSIF, Satse e UXT o proxecto de decreto de emprego público para persoal estatutario de 2021, que inclúe unha oferta de 1.203 prazas.
Segundo detallou a Consellería de Sanidade, a directora xeral de Recursos Humanos do Sergas, Ana Comesaña, e a directora xeral de Saúde Pública, Carmen Durán, trasladaron a previsión dunha convocatoria de 686 prazas nas diferentes categorías sanitarias no marco da mesa sectorial, que se reuniu este venres.
En concreto, esta nova oferta, sumada ás anteriores, permitirá realizar unha oposición para cubrir 1.070 prazas de Enfermaría e, por primeira vez, a convocatoria incluirá prazas na categoría de técnico superior en Dietética.
Así mesmo, ofreceranse 425 prazas nas categorías de xestión e servizos das que 220 corresponderán á categoría de celador e 155 á de auxiliar administrativo. Tamén se incluirán 65 prazas do ámbito de atención primaria para médicos de familia, odontólogos e médicos coordinadores do 061.
Deste xeito, o Sergas ofrecerá no decreto de 2021 un total de 1.203 prazas, que esgotarán a taxa máxima de reposición de efectivos, cuxa eliminación foi solicitada pola Xunta ao Goberno de modo reiterado.
Adicionalmente, o Sergas presentou un protocolo de seguridade que estará vixente mentres dure a situación de pandemia para as oposicións e que inclúe medidas específicas para aspirantes fisicamente vulnerables. Ademais, este mes constituiranse os tribunais para as convocatorias en marcha de persoal facultativo especialista e técnicos sanitarios.
Por outra banda, na reunión presentouse aos sindicatos o anteproxecto de Orde que permitirá que o persoal de Enfermaría da comunidade poida indicar e autorizar a dispensación de medicamentos e produtos sanitarios de uso humano, establecéndose un prazo de presentación de alegacións.
A acreditación realizarase de oficio e os enfermeiros deberán estar dados de alta na Oficina virtual do profesional e contar con polo menos un ano de experiencia ou superar un curso de adaptación que ofrecerá a Administración sanitaria.
CRISE SANITARIA
No marco do encontro, as responsables sanitarias trasladaron ademais a situación da crise sanitaria na comunidade, os cribados realizados durante a última semana e a programación do proceso de vacinación en Galicia.
Así, detallaron que a instrución do Sergas prevé a vacinación por parte de enfermeiros de atención primaria na súa xornada laboral, sen prexuízo de que puidesen conformarse equipos para levar a cabo o proceso fóra do seu horario habitual.
As xerencias realizarán unha oferta para contar con persoal voluntario que poida efectuar esta actividade fóra da súa xornada. Ademais, previuse levar a cabo o proceso en centros de primaria, en domicilios e en espazos de vacinación masiva.
