A RAG impulsará o legado feminista de Pardo Bazán cun ciclo de conferencias

A Casa-Museo Emilia Pardo Bazán inaugura este xoves un ciclo de conversas con mulleres referentes en distintos ámbitos, un acto coincidente coa semana do 8M e que chega pouco despois de que o Goberno central lle negara á Xunta de Galicia a posibilidade de usar o Pazo de Meirás como escenario para a reivindicación institucional do 8M. 

Sede da RAG e Museo Emilia Pardo Bazán. MITMA - Arquivo

A Casa-Museo da prolífica autora nada den Galicia dará comezo a estas conferencias coa alcaldesa da cidade da Coruña, Inés Rey. A ela seguirana outras mulleres consideradas referencias a seguir en cadanseu ámbito: estará a académica Marilar Aleixandre, a música Susana Seivane; a delegada de Facenda en Galicia, Imelda Capote; a vicevaledora do Pobo e escritora, María Xosé Porteiro; a xefa de Urxencias do CHUAC, María de la Cámara; a artista Soledad Penalta e a que foi a primeira directora da Radio Galega, Rosa Martínez.

Os encontros estenderanse así ata o mes de decembro e, mentres a situación sanitaria se manteña nas circunstancias actuais, serán celebrados online a partir das 18h na canle de Youtube da Concellería de Cultura do Concello da Coruña. O ciclo estará inaugurado polo presidente da RAG e director da Casa-Museo Emilia Pardo Bazán, Víctor F. Freixanes e pretende retratar o avance do feminismo "cen anos despois" de Emilia Pardo Bazán; reivindicada nestas semanas como figura protofeminista, unha defensa non exenta de críticas polo suposto "branqueamento" do pasado franquista do Pazo de Meirás, entre outras cuestións.