Un ferido no choque dun camión cun furgón de obras na A-52 en Riós
Tras envorcar o tráiler produciuse unha fuga de gas-oil.
Por Europa Press / Redacción | OURENSE | 24/03/2021 | Actualizada ás 10:16
O choque dun camión contra un furgón do servizo de conservación e mantemento saldouse co condutor do primeiro ferido leve tras saír da vía o vehículo articulado pola marxe dereita e envorcar sobre o mesmo lado.
Así o informou a Garda Civil, que relatou que este sinistro tivo lugar ás 8,20 horas deste mércores no quilómetro 140 da autovía A-52 (Benavente-Porriño) no termo municipal de Riós.
Os operarios de mantemento efectuaban un corte do carril dereito para poder realizar con seguridade unhas obras de reparación do viaduto da Mente, cando "o tráiler portugués non cambiou de carril e arroiou ao furgón de mantemento", indicaron as mesmas fontes.
Por iso, o condutor do camión e único ocupante resultou ferido leve. Ademais, como consecuencia do envorco, o depósito de combustible do tráiler comezou a manar gas-oil e tiveron que intervir os Bombeiros de Verín para evitar que os fluídos poidan chegar a algún acuífero.
Por parte da Garda Civil mobilizouse un equipo de Atestados, que investiga as causas do sinistro, dúas patrullas de motoristas e un equipo de especialistas en transportes. Ademais, o GES da Gudiña colabora cos bombeiros.
