Por Europa Press / Redacción | Pontevedra | 26/03/2021 | Actualizada ás 16:07
A sección sindical de Comisións Obreiras na empresa Ence reuniu este venres a un grupo de traballadores da pasteira, das súas empresas auxiliares e do sector forestal, que se concentraron ante a sede da Deputación de Pontevedra para mostrar a súa preocupación polo futuro da fábrica de Lourizán.
Sobre un cento de persoas secundou esta mobilización que coincidiu coa celebración do pleno na administración provincial e tamén da xunta de accionistas da compañía de celulosas.
A concentración desenvolveuse sen incidentes baixo a vixilancia dun amplo despregamento de axentes da Policía Nacional. A presidenta do comité de empresa das Oficinas Centrais de Ence, Ana Cedeira, sinalou que acudían "para defender os 5.000 postos de traballo que están en xogo".
Ana Cedeira repetiu que o persoal seguirá presionando para evitar o peche a pesar de que confían na palabra da ministra de Transición Ecolóxica, Teresa Ribera, que lles asegurou que o artigo 18 da futura Lei do Cambio Climático non afectará o futuro da planta. "Nós imos confiar nela", dixo a sindicalista.
A ministra comprometeuse a impulsar unha mesa de diálogo para abordar un posible traslado da fábrica na que estarán representadas todas as partes afectadas. Por parte dos ministerios de Traballo, Industria e Transición Ecolóxica, ata a Xunta, o Concello, a empresa e os traballadores. O comité de empresa asegurou que non ten noticia desta convocatoria.
"Desde a semana pasada non houberon avances na mesa de traballo. Unha vez que estableza os contactos darannos unha data para empezar a falar. Entendo que despois de Semana Santa saberemos algo e fixarannos data", recoñeceu Ana Cedeira.
Pola súa banda, o secretario de organización comarcal de Comisións Obreiras, José Luís García Pedrosa, insistiu en que "a posición do colectivo de traballadores afectados é clara: Ence en Lourizán ata o 2073".
García Pedrosa cargou contra o alcalde de Pontevedra, Miguel Anxo Fernández Lores, que avogou por un espazo de diálogo operativo e apuntou que el limitaría a súa composición ás partes que teñen competencias e capacidade de decisión sobre o futuro da fábrica: Estado, Xunta e a propia empresa.
"Que Lores pretenda que da mesa de diálogo estean excluídos os traballadores é unha mostra mais do seu desprezo cara aos traballadores, e por tanto, cara á maior parte da cidadanía de Pontevedra, que está conformada maioritariamente pola clase obreira", sentenciou este sindicalista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.