Un 40% dos emigrantes retornados en Ourense poderá deducir as cotizacións á seguridade social

Un 40% dos emigrantes retornados pensionistas en Ourense poderán deducir as cotizacións á seguridade social, segundo as estimacións trasladas este mércores polo secretario de emigración do PSOE provincial, Luís Gulín.

Así o considera o Partido Socialista despois da sentenza do Tribunal Económico Administrativo Central sobre as pensións exclusivamente estranxeiras, que establece que as contribucións á seguridade social do país de orixe son gastos deducibles nas declaracións da renda. O socialista Luís Gulín e o avogado José Díaz afirmaron que o acordo do Tribunal Económico Administrativo Central beneficia os pensionistas exclusivos da Unión Europea coa dedución sobre os gastos asociados á seguridade social do país de orixe.

Os socialistas estiman que entre o 30% e o 40% dos 10.000 emigrantes retornados que residen en Ourense cobran unha pensión de Alemaña polo que valoran que a resolución ten un impacto positivo na provincia.

Díaz denunciou que, cada ano, os pensionistas "perden" ao redor do 20% dos seus ingresos, o que supón "unha carga fiscal moi elevada"; e fixo un chamamento a todos os emigrantes retornados que se atopen nesa situación para que reclamen. "Unha persoa que gaña preto de 1.000 euros mensuais contribúe cunha media de 100 para esas cotizacións, son 1.200 ao ano. Ademais, Facenda retráelle 600 ou 700 porque o computan como parte da pensión", criticou o avogado.

Con iso, a secretaría provincial de Emigración do Partido Socialista en Ourense comprometeuse a continuar traballando para protexer os dereitos dos emigrantes retornados na cidade. Ademais, destacaron que están a traballar para que as prestacións de dependencia alemás queden exentas de tributación, así como polo recoñecemento de invalidez estranxeira.

Case 150 emigrantes en Latinoamérica volven a Galicia décadas despois