CC.OO. lamenta a "vaga de incendios" e pide á Xunta que cambie o "obsoleto" sistema de loita contra o lume
Censura que se manteña un sistema que "non aposta pola prevención senón pola extinción".
- Declaran controlado o incendio rexistrado en Ortigueira e que afecta case a 70 hectáreas
- A chuvia axuda a apagar o incendio do Courel tras calcinar case 300 hectáreas
Por E.P. | Santiago de Compostela | 06/04/2021 | Actualizada ás 19:46
Comisións Obreiras lamentou a "vaga de incendios" rexistrada en Galicia nas últimas xornadas con "máis de 600 hectáreas" queimadas e que, a xuízo do sindicato, evidencian o "obsoleto" modelo de loita contra o lume da Xunta "baseado na extinción".
A central sinala que "de pouco serve" que o conselleiro do Medio Rural, José González, "se encha a boca" apelando á "prevención" cando "esta é practicamente inexistente".
O sindicato censura que a Xunta manteña un sistema que "non aposta pola prevención senón pola extinción" a través dun sistema de contratacións "en acordeón" --en referencia aos contratos de doce, nove e seis meses-- a pesar de que a actividade incendiaria "está totalmente desestacionalizada e non se concentra só nos meses de verán e un de primavera como hai 15 anos".
"Calquera mes do ano pode ter picos de importante actividade", denuncia CC.OO., que insiste na necesidade de adoptar un "cambio de modelo" que se centre na prevención e contemple a extinción "como emerxencia" contando cun "colectivo estable que traballe os 12 meses do ano".
Así as cousas, o sindicato advertiu que algúns dos incendios rexistrados nos últimos días déronse en zonas "que estaban sen persoal", o que, segundo sostén, implicou o "desprazamento" de "moitos medios doutros distritos para atender as emerxencias producidas".
