Reitores e Goberno garanten a "normal celebración" da selectividade nas datas previstas
O estudantado de Galicia está chamado a examinarse entre o 8 e o 10 de xuño.
Por E.P. | MADRID | 08/04/2021 | Actualizada ás 13:22
Crue Universidades Españolas e o Goberno acordaron que se establecerán os procedementos necesarios para garantir a "normal celebración" das probas de avaliación para o acceso á Universidade, isto é, para a EBAU (antiga Selectividade), nas datas previstas. Os reitores mantiveron nestes meses reunións de traballo co Ministerio de Educación e FP e o Ministerio de Universidades "para fixar o modelo e os criterios da proba de acceso á Universidade para o curso 2021-2022".
Froito destas negociacións, decidiron que, "tendo en conta a situación de emerxencia sanitaria ocasionada pola COVID-19, velarase por que se arbitren os procedementos necesarios para garantir nas datas previstas a normal celebración das probas de avaliación para o acceso á Universidade".
Segundo a orde ministerial publicada en xaneiro pola que se determinan as características, o deseño e o contido da EBAU, así como as datas máximas de realización e de resolución dos procedementos de revisión das cualificacións obtidas para este curso 2020-2021, a Selectividade celebrarase finalmente de maneira presencial, a pesar das medidas extraordinarias que poidan tomarse no contexto da pandemia.
A orde tamén establece a celebración da EBAU para antes do 18 de xuño en convocatoria ordinaria e para antes do 16 de xullo ou do 16 de setembro (segundo decida a comunidade autónoma a súa celebración nun mes ou outro) no caso da convocatoria extraordinaria. No caso de Galicia, o alumnado está chamado a examinarse, concretamente, entre o 8 e o 10 de xuño.
"EXITOSA EXPERIENCIA DO ANO PASADO"
Os reitores veñen defendendo a presencialidade desde o principio. Segundo afirman, a realización dos exames de forma presencial "asegura a protección do estudiantado e o seu dereito á Educación". Neste sentido, defenden "a exitosa experiencia do ano pasado" que, ao seu xuízo, "avala que estas probas se poden realizar con absoluta normalidade aplicando os protocolos sanitarios para a COVID-19 que inclúen todas as medidas hixiénico-sanitarias indicadas polas autoridades".
