(Vídeo) Un documental para contar a cara B da historia recente de Galicia en clave musical

A pandemia paralizou parte da cultura galega ata o punto de poñer en serias dificultades algúns dos seus sectores, pero tamén hai quen aproveita a treboada para saír ao mar. Tal sería o caso dos profesionais detrás do documental Semente de Berrar, un proxecto que pretende reflectir "en notas máis ou menos afinadas" parte da contracultura galega ao longo dos últimos corenta anos.

O obxectivo de Semente de Berrar, que se constitúe como un proxecto autoxestionado, pasa por recoller as experiencias de 40 persoas para retratar eses corenta anos "de subculturas urbanas e tamén rurais. Corenta anos de Galiza rebelde e festiva. Corenta anos de drogas na rúa e deportes. Corenta anos musicando realidade e a ficción. Corenta anos de precariedade laboral e loita obreira".

Para retratar tan diverso panorama, os produtores da peza escollen falar coas bandas, o público, "os donos de tendas de roupa ou música, editores de  fanzines ou xornais". En conxunto, unha selección do máis colorido para tentar botar luz nesas derradeiras e aceleradas décadas desa parte do panorama cultural galego que se atopa nos bares e non nos museos.

Polo momento, os produtores do documental contan xa cun teaser dispoñible en aberto e están a recadar fondos para tentar sacar adiante este proxecto a través dunha campaña de microfinanciamento en páxinas como goteo.org, onde xa recibiron 12.000€.  Todo para contactar con esa selección de 40 persoas "destes 40 anos de amor e odio".