O papel da muller na música a debate este xoves na Coruña con Susana Seivane
O encontro ábrese ao público e poderá seguirse tamén en directo na canle de Youtube de Cultura da Coruña.
Por E.P. | SANTIAGO DE COMPOSTELA | 05/05/2021 | Actualizada ás 19:03
A gaiteira e empresaria Susana Seivane protagonizará este xoves, 6 de maio, a terceira sesión das xornadas 'As mulleres, cen anos despois de Emilia Pardo Bazán: Conversacións na Casa-Museo', organizadas polo Concello da Coruña en colaboración coa Real Academia Galega a través da Casa-Museo Emilia Pardo Bazán.
Na súa intervención, Seivane poralles nome ás pioneiras da gaita en Galicia e reflexionará sobre a situación das mulleres que se dedican á música, nunha conversación co xornalista Manuel Rodríguez que terá lugar a partir das 18,00 horas no salón de actos da Real Academia.
O encontro ábrese ao público e poderá seguirse tamén en directo na canle de Youtube de Cultura da Coruña. Debido ás limitacións de capacidade da sala, en cumprimento das medidas de prevención da covid-19, recoméndase reservar praza no correo electrónico difusion@academia.gal, indicando nome completo, DNI e número de teléfono.
Polo ciclo 'As mulleres, cen anos despois de Emilia Pardo Bazán: Conversacións na Casa-Museo' pasarán, entre marzo e decembro, oito mulleres de recoñecido prestixio que reflexionarán sobre o conseguido no campo da igualdade de xénero un século despois da morte da escritora coruñesa. A seguinte sesión, o 3 de xuño, estará protagonizada pola escritora, xornalista e vicevaledora do Pobo, María Xosé Porteiro.
