Iniciativa para potenciar Valdeorras dende o sector da Pizarra e do enoturismo
O xerente do Clúster da Pizarra de Galicia, Severino González, mantivo o pasado 5 de maio unha xuntanza co presidente da Ruta do Viño de Valdeorras, Joaquín Sánchez, e a súa vicepresidenta, Montserrat Rodríguez. Obxectivo: potenciar o turismo na zona.
Por X.M. Fernández | O Barco de Valdeorras | 09/05/2021 | Actualizada ás 10:30
A xuntanza tivo como obxectivo sentar as bases para unha futura colaboración máis continuada entre ambos organismos de cara a potenciar o turismo no territorio, tanto dende o ámbito industrial como dende o enoturístico.
Tal e como destacou González ao finalizar a xuntanza “foi unha reunión produtiva de traballo” entre dous organismos “que teñen moito que dicir na economía de Valdeorras”. “Establecer sinerxias e promover proxectos de colaboración en común entre o Clúster da Pizarra e a Ruta do Viño foi o obxectivo desta primeira xuntanza”, asegurou Severino González.
O presidente da Ruta do Viño de Valdeorras, Joaquín Sánchez, pola súa parte, afirmou que “queremos comezar unha relación estable e continuada, que desenvolveremos en base a un convenio que redactaremos nos próximos meses”.
