Por X.M. Fernández | Allariz | 20/05/2021 | Actualizada ás 09:30
O Festival, que non se puido facer no 2020, volve este ano con forza e xa se pode visitar tras a súa inauguración oficial o pasado 15 de maio.
Paisaxistas chegados dende Galicia, o resto da península e diferentes puntos do mundo coma Arxentina, China, Italia ,Colombia, Portugal ou Alemaña, amosarán as súas creacións orixinais especialmente pensadas para a ocasión nunha edición na que a poesía é a protagonista. Figuras das letras coma Rosalía, Pessoa, Federico García Lorca, Machado, Emily Dickinson ou a mesma Xela Arias, homenaxeada polo Día das Letras Galegas 2021, lucirán nun recinto de preto de 40.000 m2.
O Festival Internacional de Xardíns de Allariz é un gran proxecto multidisciplinar que tenta achegar á cidadanía o gusto pola natureza e a paisaxe a vez que tenta concienciar sobre o coidado do medio ambiente e da súa importancia nos nosos días. Un espazo ao aire libre onde ano tras ano podemos atopar 10 parcelas en concurso e desfrutar da parcela dos centros educativos de Allariz e o xardín gañador da última edición (dedicada ao cine) “Sé o heroe da túa propia película” que nesta ocasión coincide co fallo da Asociación Española de Xardinería que destaca ao gañador polas súas características conceptuais, botánicas e de sustentabilidade.
INICIATIVAS PARALELAS
Dende o concello preténdese que todo Allariz respire poesía, e para alcanzar este obxectivo puxeron en marcha varias iniciativas. Por un lado un concurso de escaparates no comercio local no que a poesía e a xardinería son os temas principais a integrar. Por outra banda esta semana comezará unha acción promocional coa hostalería, por medio de azucres coa imaxe do festival e cun poema do poeta allaricense Carlos Da Aira, que se servirá en todos os establecementos da vila.
Así mesmo, estase a valorar a realización de actividades culturais no propio recinto ata o seu peche en outubro, actividades relacionadas coa poesía pero tamén con outras disciplinas coma a música ou a danza.
NOVIDADES E HORARIOS
Coma novidade este ano, os visitantes poderán elixir o seu xardín favorito do Festival a través dun sistema de votacións de códigos QR que se lle facilitará coa entrada do recinto.
Horarios: de luns a venres das 17:00 ás 21:00h e sábados, domingos e festivos de 11:30 a 14:00 h. e de 17:00 a 21:00h. Este horario manterase ata o 14 de xuño, pasando a ampliarse a partir dese día, de luns a domingo mañá e tarde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.