"O rural galego foi o máis prexudicado pola redución de trens do estado de alarma"
Demandan a Renfe a restitución das liñas suspendidas en abril de 2020: "este horario é incompatible coas necesidades da cidadanía".
Por Galicia Confidencial | SANTIAGO DE COMPOSTELA | 25/05/2021 | Actualizada ás 21:40
Nova demanda no marco das comunicacións e transportes de Galicia. Co estado de alarma de 2020 non foron poucos os operadores de servizos públicos que decidiron reducir ou eliminar determinadas frecuencias ante a natural baixada de tráfico. Porén, dende hai xa meses proliferan voces denunciando que tanto RENFE como as principais compañías de autobús manteñen traxectos suspendidos malia a fin do estado de alarma.
A RENFE xa anunciou que o vindeiro día 7 ten previsto aumentar as circulacións ferroviarias en Galicia, se ben, de acordo co sindicato CGT, aínda non foron especificadas cales. O anuncio da compañía pública chega pouco despois de que a formación sindical reclamara a reposición de traxectos tanto no ámbito autonómico como estatal, unha restitución que está por ver se se concreta ou non na ampliación do día 7.
A RENFE xa anunciou que as ampliación se desenvolverán no marco dos traxectos de media distancia, un dos espazos máis aqueixados polas limitacións, de acordo coa CGT. Así, o sindicato chama a atención sobre as problemáticas ocasionadas pola eliminación dos trens "de primeira e derradeira hora do día con inicio e remate en Vigo", suprimidos dende abril de 2020.
"As cidades de Arcade, Catoria, Padrón e Pontecesures non teñen ningún tren entre as 6:20 e as 11 da mañá, sendo o rural galego o mais perxudicados cos novos horarios establecidos por RENFE durante o estado de alarma", aseguran. Tamén reclaman a restitución do primeiro tren AVANT da mañá Ourense-A Coruña (6:45) e "o aumento de circulacións no resto de corredores internos de Galiza".
A CGT solicita, á parte, a reposición dos trens con saída 6:58 Vigo Guixar-Compostela, 7:25 Vigo Guixar-Pontevedra e regreso 8:00 Pontevedra-Vigo Guixar, 21:35 Vigo Urzaiz-A Coruña. "Agora mesmo o derradeiro tren que sae cara a Pontevedra, Vilagarcía, Compostela e coruña sae ás 20:30 hs de Guixar, horario incompatible coas necesidades laborais e de ocio da cidadanía galega", explican.
