Por E.P. | A Coruña | 18/06/2021 | Actualizada ás 17:40
A Federación Galega de Municipios e Provincias (Fegamp) volveu demandar fondos a Xunta e Goberno central e advertiu da situación de "risco" de servizos esenciais como o Servizo de Axuda ao Fogar.
Fíxoo tras unha reunión do seu presidente, Alberto Varela, coa alcaldesa da Coruña, Inés Rey. Tras ela, Varela reiterou á Xunta e ao Goberno central que é "imprescindible" a participación activa dos concellos na reconstrución e a transferencia urxente de fondos.
Varela e Rey coincidiron na urxencia dunha repartición e financiamento. "O diñeiro ten que chegar xa aos concellos, xa que somos a única administración que estamos a enfrontar todo isto cos nosos propios medios, a diferenza da Xunta de Galicia e do Goberno do Estado que si recibiron transferencias", dixo sobre o contexto de pandemia.
Pola súa banda, a alcaldesa da Coruña defendeu que, desde o inicio da pandemia, o goberno local asumiu competencias da Xunta.
"Somos as administracións locais as que lle estamos a dar resposta aos sectores máis prexudicados pola crise con recursos propios e sen ter achegas como as que tivo a administración autonómica", expuxo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.