Feijóo condena a homofobia pero repudia a Pontón por "facer política cun asasinato"
"Estamos afeitos a case todo, pero que algún grupo parlamentario en Galicia faga política cun asasinato é algo que xa forma parte da biografía tanto política como individual das persoas que fan estas manifestacións", aseverou Feijóo en alusión ao BNG.
Por Europa Press / Redacción | Compostela | 08/07/2021 | Actualizada ás 17:06
O presidente da Xunta, Alberto Núñez Feijóo, insistiu este xoves en mostrarse cauto sobre "o móbil" da malleira que acabou coa vida de Samuel Luiz e repudiou, tras condenar a violencia e de forma expresa a homofobia, a aqueles políticos que "fan política cun asasinato".
"Asasinar a alguén sempre é algo miserable; entre varios e cunha malleira con resultado de morte é dunha covardía difícil de explicar", reflexionou, a preguntas dos medios na rolda de prensa posterior ao Consello da Xunta, antes de aseverar que os políticos non son "xuíces, nin gardas civís, nin policías".
"E cando un político usa un asasinato para facer política excede todas as raias admitidas", sentenciou, antes de lembrar que, segundo transcendeu, os detidos afirman que non coñecían á vítima. "Pódese, en consecuencia, sacar unha extrapolación directa, inmediata e relacionada entre a causa, disparatada e o efecto?", preguntouse.
CRÍTICAS A PONTÓN E O BNG
"Estamos afeitos a case todo, pero que algún grupo parlamentario en Galicia faga política cun asasinato é algo que xa forma parte da biografía tanto política como individual das persoas que fan estas manifestacións", aseverou Feijóo. Aínda que non deu ningún nome, o presidente galego realizou estas manifestacións na mesma semana na que a portavoz nacional do BNG, Ana Pontón, afeoulle unha actitude, ao seu xuízo, "equidistante" en relación ao crime de Samuel.
Feijóo, pola súa banda, esgrimiu que igual que o seu Executivo condena a violencia, condena "con igual rotundidade calquera tipo de homofobia". "E é lamentable que haxa políticos facendo política cun asasinato", insistiu.
REMATAR AS INVESTIGACIÓNS
Na súa resposta, insistiu en que a Xunta non ten "ningunha notificación" dos investigadores sobre "o móbil ou a causa directa ou indirecta" da malleira mortal a Samuel, antes de engadir que os pronunciamentos chegarán cando isto ocorra.
En fronte, reprobou que "hai partidos que en función de quen sexa o autor ou a vítima condenan con maior ou menor intensidade o asasinato". Con todo, afirmou que a "condena" do Executivo autonómico é "igual de rotunda" con independencia diso. Finalmente, insistiu na "absoluta sorpresa" que lle produce o "comportamento dalgunhas deputadas e dalgún deputado" do Parlamento.
