Xunta e Goberno pactan que a Lei de Saúde galega aclarará o carácter voluntario da vacinación
Tamén que a vacinación se aplicará de acordo co fixado polo Goberno no exercicio das súas competencias e de acordo coa estratexia estatal.
Por Europa Press / Redacción | SANTIAGO DE COMPOSTELA | 28/07/2021 | Actualizada ás 18:02
O Goberno galego celebrou que a Administración do Estado decidise, como anunciou o presidente autonómico, Alberto Núñez Feijóo, retirar o recurso que presentara ante o Tribunal Constitucional (TC) contra a reforma da lei de saúde de Galicia, tras un acordo alcanzado no seo da comisión bilateral.
Días despois de que o TC levantase a suspensión cautelar da maior parte de preceptos recorridos --a excepción do apartado de vacinación--, Feijóo anunciou que este mércores se alcanzou un acordo no grupo de traballo constituído, en paralelo ao proceso xudicial, coa intención de negociar a redacción final do texto.
A Xunta emitiu un comunicado no que celebra o acordo selado e explica, na liña do avanzado polo xefe do Executivo, que a lei recollerá unha disposición adicional sobre a aplicación das medidas de vacinación no marco das competencias estatais de coordinación xeral da sanidade e da estratexia estatal de vacinación.
Tendo en conta ese acordo, a lei aclarará o carácter voluntario da vacinación con carácter xeral, e que se aplicará de acordo co establecido pola Administración Xeral do Estado no exercicio das súas competencias e de acordo tamén coa estratexia nacional de vacinación vixente, no marco do que determine o Consello Interterritorial do Sistema Nacional de Saúde.
Ademais, as campañas de vacinación vanse a articular sobre o principio da colaboración voluntaria das persoas afectadas coas autoridades sanitarias.
A XUNTA LEMBRA QUE SEMPRE ESTIVO DISPOSTA A NEGOCIAR
En base a este acordo, e unha vez modificado o punto da normativa, a Administración estatal anunciou a súa intención de desistir do recurso interposto ante o TC.
A Xunta --cuxos dirixentes sempre defenderon que a lei galega non establecía "a vacinación obrigatoria"-- lembra que "desde o primeiro momento" manifestou a súa vontade de negociar a redacción do texto que dera lugar ao recurso, ademais de manifestar o paso dado polo Goberno sen abrir antes "un diálogo" coa Administración autonómica.
