Conde destaca a "competitividade a través dos procesos de innovación" de Finsa en San Cibrao das Viñas
O vicepresidente económico e conselleiro de Economía destacou que xera máis de 3.000 empregos directos e 150 deles na fábrica ourensá.
Por E.P. | SANTIAGO DE COMPOSTELA | 04/08/2021 | Actualizada ás 16:45
O vicepresidente económico e conselleiro de Economía, Empresa e Innovación da Xunta, Francisco Conde, visitou este mércores as instalacións do grupo empresarial Finsa en San Cibrao das Viñas, onde puxo en valor a "competitividade a través dos procesos de innovación" e os proxectos de mellora de eficiencia enerxética.
Conde trasladou que na fábrica de Ourense levan a cabo novos proxectos e asume novos procesos que contribúen a "situar a planta na vangarda da dixitalización e a sustentabilidade", o que permite que o grupo "continúe mantendo o seu liderado na industria forestal", engadiu.
Por iso, felicitou ao persoal da planta "por ter esta iniciativa e por ter a ambición de manter a competitividade en todo o grupo". O vicepresidente, ademais, puxo de relevo que Finsa supón para Galicia "unha referencia", xa que factura máis de 900 millóns de euros", 70 dos cales se producen na fábrica do Polígono de San Cibrao das Viñas.
Ademais destacou que xera máis de 3.000 empregos directos ,150 deles na fábrica ourensá. Así mesmo, Conde coñeceu as iniciativas de innovación desenvolvidas na empresa e indicou que na fábrica desenvólvese o proxecto 'Enxeño+', baseado na produción sustentable de novos taboleiros a través das tecnoloxías 4.0, co que se mobilizarán 10,5 millóns de euros.
Para esta iniciativa explicou que o Goberno galego inviste 2,6 millóns de euros a través do programa 'Fábrica Intelixente' posto en marcha pola Axencia Galega de Innovación.
EFICIENCIA ENERXÉTICA
No marco do apoio da Xunta, Francisco Conde destacou que o grupo Finsa destina 1,4 millóns de euros na mellora da súa eficiencia enerxética, un investimento á que o Goberno autonómico "apoia co 30% a través das liñas de axuda destinadas a este tipo de propostas" industriais galegas, comentou.
Neste sentido, manifestou que a Xunta "facilitou" a execución de 36 proxectos de eficiencia enerxética en pemes e grandes empresas da industria galega que mobilizan máis de 45 millóns de euros, "co que se espera un aforro anual de máis de 20 millóns de euros na factura eléctrica do sector industrial", concluíu.
