Aberto o prazo para solicitar o 'Bono Coidado'
Pode pedirse desde este martes, 10 de agosto, e ata o 30 de setembro.
Por E.P. | SANTIAGO DE COMPOSTELA | 09/08/2021 | Actualizada ás 18:06
A Xunta abre este martes o prazo para o 'Bono Coidado', unha axuda económica destinada á atención das necesidades puntuais de conciliación das familias galegas. As persoas interesadas poderán presentar a súa solicitude ata o 30 de setembro.
O Diario Oficial de Galicia publica este luns a orde da convocatoria que este ano inclúe como novidade a axuda para financiar servizos de conciliación en períodos vacacionais, como campamentos. O 'Bono Coidado' permitirá solicitar a contratación dun servizo de conciliación no caso de enfermidade da crianza ou da persoa coidadora habitual, para cuestións de carácter laboral ou para outro tipo de situacións.
Coas novidades da convocatoria, ofrecerase unha axuda durante o verán para a contratación dunha persoa ou para acudir a centros autorizados (ludotecas, espazos infantís ou servizos semellantes), sempre que ambos proxenitores acrediten que, por motivos laborais, non poden facerse cargo da atención da crianza de ata 12 anos.
A Xunta destina uns 1,8 millóns de euros a esta iniciativa, ampliables en función das solicitudes presentadas e que tamén atenderán as necesidades de conciliación inscritas desde o 1 de xaneiro deste mesmo ano.
