Unha cabicha, a orixe do incendio da Pobra que afectou a 100 metros cadrados
Trabállase na investigación para verificar a procedencia deste cigarro mediante proba de ADN.
Por Europa Press / Redacción | SANTIAGO DE COMPOSTELA | 26/08/2021 | Actualizada ás 13:07
Unha cabicha é a orixe dun incendio que calcinou 0,01 hectáreas de superficie no municipio coruñés da Pobra do Caramiñal este mércores. A Unidade de Investigación de Incendios Forestais desprazouse in situ ao lugar do lume e determinou, de forma preelminar, a causa do lume en colaboración cos axentes ambientais do distrito IV-Barbanza.
O incendio iniciouse ás 14,59 horas na parroquia de Xobre ou O Maño e deuse por extinguido ás 16,18 horas, afectando a 0,01 hectáreas de monte raso, grazas á intervención do Servizo de prevención e defensa contra os incendios. Para o seu control mobilizáronse dous axentes, dúas brigadas e unha motobomba.
Tras a localización da cabicha, trabállase na investigación completa, conxuntamente coa Policía Nacional, para verificar a procedencia deste cigarro mediante proba de ADN, continuando desta maneira coas dilixencias oportunas. A Xunta pide prudencia nos montes e lembra que máis do 70 por cento do territorio está vixiado por 142 cámaras e 12 drones.
