Por Europa Press / Redacción | VIGO | 27/08/2021 | Actualizada ás 13:51
A Garda Civil detivo a unha veciña do Vao, en Poio, sobre a que pesaban dúas ordes xudiciais de localización e detención, e que ingresou en prisión en cumprimento de senllas sentenzas penais pendentes.
Segundo informou o Instituto Armado, a detención produciuse o pasado mércores, cando unha patrulla de Seguridade Cidadá interceptou un vehículo cos cristais tintados das portas traseiras á súa saída do poboado do Vao.
Ao identificar os ocupantes, os axentes comprobaron que a muller que viaxaba nos asentos de atrás tratou de enganalos achegando un nome falso. Os gardas déronse conta de que se trataba doutra persoa, unha veciña do Vao, coñecida polos seus antecedentes policiais, e que tiña pendente dúas ordes de localización e captura.
Así, unha das requisitorias fora emitida polo Xulgado do Penal 1 de Pontevedra, por un delito de estafa; e a outra era do Xulgado do Penal 2 da mesma cidade, por un delito de roubo con violencia e intimidación. Unha vez instruídas as dilixencias policiais, a muller foi posta a disposición da autoridade xudicial, que dispuxo o seu ingreso no Centro Penal da Lama.
PROCESADOS "REBELDES"
Segundo informou a Garda Civil, no que ha vai de ano este corpo localizou e detivo a 153 "procesados rebeldes" na provincia de Pontevedra, é dicir, persoas sobre as que pesa unha requisitoria xudicial para a súa localización e detención.
Trátase de persoas que deben personarse por algún motivo nos xulgados, ou ben que teñen sentenzas pendentes de execución e deben ingresar en prisión.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.