O BNG de Santiago pedirá a redución do recibo de Viaquia polas molestias causadas a raíz da vertedura de xurro
Preguntará no pleno polas posibles sancións á empresa concesionaria da auga e á explotación que provocou a contaminación
Por Europa Press / Redacción | SANTIAGO DE COMPOSTELA | 21/09/2021 | Actualizada ás 11:36
O BNG de Santiago pedirá no pleno municipal de setembro que o goberno local lle reclame á empresa concesionaria Viaqua unha redución dos recibos da auga aos usuarios polos problemas ocasionados e o gasto xerado de comprar auga embotellada a raíz da vertedura de xurro rexistrado nunha explotación gandeira.
"Ante a grave vertedura que afecta a subministración de auga potable desde o día 9 de setembro na comarca de Compostela, é necesario solicitar maior transparencia, control e sancións por parte da Xunta para solucionar esta crise e evitar que poida repetirse a contaminación aos ríos e mananciais, con medidas destinadas a protexer un ben básico como é a auga", sinala nun comunicado a portavoz municipal do BNG, Goretti Sanmartín.
Na iniciativa, o Bloque insta o goberno local a esixir da Xunta e da empresa concesionaria Viaqua responsabilidades pola demora en informar e actuar ante un problema de tal magnitude e proporá que se reclamen axudas para un plan de rexeneración da flora e da fauna danadas polas verteduras.
Ademais, os nacionalistas composteláns propoñen que se reclame á empresa concesionaria unha redución dos recibos polo incremento de plástico xerado ao comprar os veciños un maior volume de botellas e garrafas para o consumo.
Así mesmo, esixirá información sobre se se sancionará á concesionaria por permitir que entrase auga con altos niveis de turbiedade, mal cheiro e exceso de cloro (ou mesmo bacterias coliformes de ser o caso) na rede de subministración das vivendas, ademais de saber se se van a ter en conta os erros producidos pola empresa á hora de elaborar os pregos e adxudicar o concurso sobre deste servizo.
