A Xunta defende que "turistas e a ciencia cidadá" sirvan para detectar especies invasoras
Un novo estudo de Mar apunta a un "bo" recrutamento de ameixa na ría de Ferrol. O BNG alerta do "colapso" da ría e da "expulsión" do emprego.
Por Europa Press / Redacción | SANTIAGO DE COMPOSTELA | 21/09/2021 | Actualizada ás 13:01
A directora xeral de Desenvolvemento Pesqueiro, Susana Rodríguez, puxo en valor a rede de observadores do medio mariño galego (Redogal), que ten como obxectivo principal detectar e avaliar a presenza de especies mariñas non habituais no litoral galego que poidan ser indicadoras de cambios ou alteracións no ecosistema mariño.
En resposta a unha pregunta do PP nesta comisión, sinalou que se pretende utilizar "a ciencia cidadá" --a través de profesionais do mar, mergulladores, técnicos e, "por que non, turistas"-- para poder anticiparse a "situacións complicadas", como poida ser a aparición de especies invasoras. Para iso, destaca que se traballa en xornadas formativas e en saídas didácticas para escolares.
AMEIXA DE FERROL
Por outra banda, informou de que un novo estudo, realizado este mes de setembro pola Consellería do Mar, nos bancos marisqueiros da ría de Ferrol apunta a "un bo" recrutamento de ameixa.
En resposta a unha pregunta do BNG na comisión de Pesca, Susana Rodríguez expresou que se trata da terceira mostraxe consecutiva con melloría, aínda que chama a "ver que pasa para que chegue a tamaño comercial", mentres lembra a mortalidade existente nas Pías pola presenza do parásito 'Perkinsus olseni'.
Igualmente, defendeu o investimento do Goberno galego entre 2019 e 2020 de máis de 400.000 euros para a recuperación da ría, á vez que hai comprometidos máis de 780.000 euros para o período 2021-22. Así mesmo, expón que os mariscadores teñen un "rendemento diario digno para o seu traballo".
Pola súa banda, Ramón Fernández Alfonzo (BNG) alertou da "situación actual da ría de Ferrol é de colapso" e de "expulsión a nivel de emprego". Pon de exemplo que no ano 2000 a produción de ameixa babosa --o principal produto pesqueiro da ría-- era de 427.000 quilos, mentres en 2020 quedou en 32.000 quilos, un 7,5% respecto de 20 anos antes. Así mesmo, os permisos descenderon en 10 anos de 262 a 146, aínda que só "un 20%" das persoas que teñen pérmex "están a saír a marisquear".
Por iso, Fernández Alfonzo pregunta "por que a Xunta boicotea a realización dun estudo integral da situación da ría de Ferrol", xa que "non hai ninguén en Ferrol que comprenda" esa decisión, pois lamenta que é "un tesouro produtivo que se está deixando morrer".
