Por Europa Press / Redacción | A CORUÑA | 24/09/2021 | Actualizada ás 14:01
A Axencia Estatal de Meteoroloxía (AEMET) prevé que o próximo trimestre en Galicia sexa "máis cálido e máis seco" do normal, segundo informou o seu delegado na comunidade, Francisco Infante, este venres nunha rolda de prensa celebrada na Delegación do Goberno na Coruña.
Infante sinalou que o tempo mellorará a partir da próxima semana, aínda que este fin de semana manterase "inestable", con treboadas o venres e precipitacións na mañá do sábado e a noite do domingo.
Na primeira quincena de setembro, a temperatura estivo "por encima do normal", pero segundo apuntou, nos últimos días estas están a baixar. Infante destacou tamén as treboadas que se produciron durante este período que ocasionaron danos en varias zonas.
Respecto ao anterior trimestre, o delegado do AEMET cualificou ao verán en Galicia como "normal" en temperatura e precipitacións. Xullo foi o máis frío desde o ano 2012, pero foi compensado por un agosto cálido, no que se alcanzou a temperatura máis alta do verán, con 39,1 graos en Verín.
MES TREBOENTO
O responsable da Aemet destacou o "carácter treboento" do mes de xuño. Entre o 10 e o 18 houbo treboadas de forma ininterrompida e estas producíronse nun total de 14 días, o que provocou que fose un mes "húmido".
Doutra banda, Infante explicou que xullo e agosto foron meses "secos". En xullo houbo un 40% menos de precipitacións e en agosto, un 50% menos respecto do habitual. O delegado tamén mencionou que se produciron "valores moi baixos" de horas de sol en Pontevedra, A Coruña e o norte de Lugo durante o mes de xullo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.