Caen os casos activos de covid-19 en Galicia, pero soben os hospitalizados
A área de Ferrol queda sen hospitalizados por coronavirus nunha xornada na que os contaxios detectados seguen por baixo dos 60.
Por Europa Press / Redacción | Santiago de Compostela | 25/09/2021 | Actualizada ás 11:39
Os casos activos de Covid-19 en Galicia manteñen a tendencia descendente, pero os pacientes hospitalizados crecen lixeiramente ata os 59 --dous máis--. Mentres tanto, os contagios detectados a diario mantéñense en torno ao medio centenar.
Segundo os datos actualizados pola Consellería de Sanidade este sábado, con rexistros ata as 18,00 do venres, hai 18 persoas ingresadas en unidades de coidados intensivos --unha máis--, mentres que outras 29 están en planta --unha máis--.
Por áreas sanitarias, a presión hospitalaria redúcese en tres (Ferrol, Ourense-Verín-O Barco de Valdeorras e Vigo), pero aumenta lixeiramente nas outras catro (A Coruña-Cee, Lugo-A Mariña-Monforte, Pontevedra-O Salnés e Santiago-Barbanza).
En canto ás que soben, A Coruña contabiliza 17 ingresados con covid (+2), dos que cinco (sen cambios) están críticos. Séguelle a área de Lugo, con 13 hospitalizados (+1), dous deles na UCI (tamén sen variacións).
Mentres tanto, a área sanitaria de Santiago-Barbanza contabiliza 12 hospitalizados por coronavirus (+2), aínda que en coidados intensivos mantéñense tres, e en Pontevedra-O Salnés hai sete (+1), dous deles (+1) na UCI.
No lado oposto, os hospitais da área de Ourense reducen a sete os ingresados (-2), dos que catro se manteñen críticos; na de Vigo descenden a tres (-1), dous deles en UCI; e en Ferrol xa non hai persoas con coronavirus que requiren de hospitalización.
CASOS ACTIVOS EN DESCENSO
Galicia mantén a tendencia descendente de casos activos de covid-19, que se sitúan en 1.443, o que supón 120 menos que os rexistrados a xornada anterior, ao haber de novo máis altas (175), que contaxios (58), aos que se suman dúas novas vítimas mortais.
Así, Galicia xa conta con menos de 1.500 infeccións activas, a niveis de hai tres meses. E é que a última xornada cunha cifra tan baixa foi o 25 de xuño.
Por áreas sanitarias, os pacientes covid seguen en descenso en todas elas. A Coruña-Cee rexistra, de acordo cos últimos datos, 340 casos activos (-43). Séguenlle a de Vigo, con 287 (-12), e a de Lugo-A Mariña-Monforte, con 268 (-28).
Mentres tanto, Santiago-Barbanza conta con 208 infeccións activas (-12), Ourense-Verín-O Barco ten 201 (-10), Pontevedra-O Salnés 101 (-7) e Ferrol pecha a táboa con 38 (-8).
No inicio da fin de semana, os contaxios de covid-19 detectados nun día por todo tipo de probas mantéñense por baixo do cento, cun lixeiro incremento a 58, tres máis que os 55 rexistrados este venres.
Os contaxiados de coronavirus en Galicia desde o inicio da pandemia ascenden a 182.077, dos cales 43.021 corresponden á área da Coruña; 37.562, á de Vigo; 26.927, á de Santiago; 21.673, á de Ourense; 21.396, á de Pontevedra; 19.880 á de Lugo; e 11.618, á de Ferrol.
