Galicia xa ten torta de queixo "con alma galega" para exportar: "Exquisiña"
Tres empresas galegas e dous coñecidos chefs do país presentaron este mércores esta nova receita.
Por Galicia Confidencial | Santiago | 06/10/2021 | Actualizada ás 21:00
Exquisiña foi presentada públicamente este mércores, nun acto no Centro Superior de Hostalería de Galicia. Trátase dunha nova receita de torta de queixo "con alma galega" co obxectivo de "chamar a atención de lal necesidade de colaboración entre empresas".
Os promotores da iniciativa son a cooperativa láctea CLUN (participada por Feiraco), a empresa de base tecnolóxica Quescrem e a granxa avícola Pazo de Vilane. Os autores da receita son os cociñeiros Lucía Freitas e Pablo Galego, que utilizaron ingredientes do país, en concreto ovos de Antas de Ulla, nata de Ponte Maceira e o queixo de Castro Ribeiras de Lea.
A directora xeral de Pazo de Vilane, Nuria Varela-Puertas, destacou que como produtores agroalimentarios da Galicia rural, hai que "apostar pola incrible calidade dos produtos ben elaborados en Galicia, polo benestar animal, como convicción e por ser columna vertebral do territorio". "Poderemos distinguirnos e sobrevivir aos vaivéns do mercado se somos diferentes e defendemos o que facemos: producir alimentos saudables e ricos que protexan a saúde de todas as persoas, o benestar e as nosas tradicións", sinalou.
Pola súa banda, o primeiro executivo de Innolact, a empresa que creou Quescrem, Sergio Martínez salientou no seu discurso que "as empresas non só teñen a responsabilidade de ofrecer aos consumidor produtos de calidade senón tamén de promover o desenvolvemento social e económico da nosa contorna".
O secretario xeral de CLUN-Feiraco, Juan Gallástegui, reivindicou as sinerxías de traballar en cooperativa. "CLUN traballa sempre para ofrecer calidade galega porque ten un impacto positivo no noso campo", concluíu.
