Por Europa Press / Redacción | A CORUÑA | 14/10/2021 | Actualizada ás 11:56
O delegado do Goberno en Galicia, José Miñones, descartou a intervención da planta de Alu Ibérica, como reclaman os traballadores da factoría coruñesa. Mentres, en referencia á situación de Alcoa San Cibrao, dixo que a multinacional "ten que vender". Fíxoo, a preguntas dos xornalistas, coincidindo coa rolda de prensa que ofreceu para facer balance dos orzamentos do Estado para 2022 en Galicia.
Nela, e sobre as críticas dos traballadores á actuación do Goberno e os fondos de investimento industrial en comunidades como Castela e León fronte á situación da factoría coruñesa, Miñones insistiu en que o Goberno mostrou o seu "compromiso" cos traballadores a través de distintas reunións.
No entanto, dixo que a actual situación, co proceso aberto na Audiencia Nacional e a presenza dun administrador xudicial, "limita moito". "Poucas son as medidas que poderiamos establecer", apostilou.
E, aínda que asegurou que a procura dunha solución non "vai ser por falta de reunións", cualificou de "discurso pechado" a intervención. Así, defendeu que o posicionamento pasa por pór o "foco" en Alcoa para que "venda".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.