Multan a un cidadán con 600 euros por reclamar ser atendido en galego nun cribado da Covid-19

A Mesa denuncia a vulneración dos dereitos lingüísticos por parte da Delegación do Goberno.

Por Galicia Confidencial | Compostela | 18/10/2021 | Actualizada ás 12:44

Comparte esta noticia

A Mesa pola Normalización vén de denunciar os feitos acontecidos o pasado 17 de abril nun cribado da Covid19 en Rianxo. Segundo expoñen dende a entidade de defensa da lingua, un cidadán que acudiu á realización das probas diagnósticas recibiu unha "negativa rotunda" a ser atendido en galego e, ademais, mesmo se lle chegou a negar a realización do cribado e a Delegación do Goberno propuxo sancionalo cunha multa de 600 euros

Marcos Maceira, presidente da Mesa
Marcos Maceira, presidente da Mesa | Fonte: irmandade.tv

Perante a indignación do cidadán ante a negativa de ser atendido na nosa lingua, interveu a Policía Local que, apuntan dende a Mesa, non só non lle recoñeceu o seu lexítimo dereito a ser atendido en galego senón que "segundo consta no mesmo informe policial, o instou a mudar de lingua e empregar o castelán 'tentando explicar a esta persoa que ambas linguas son cooficiais na Comunidade Autónoma'”.

A entidade de defensa da lingua salienta a importancia duns feitos que en palabras do seu presidente, Marcos Maceira, "demostran que ante unha vulneración dos dereitos lingüísticos que afecta tamén ao dereito á saúde e á dignidade dun cidadán, as forzas de seguridade vulneran toda a lexislación que ampara o lexítimo dereito da cidadanía galega a empregar a nosa lingua, tentando coaccionar a un cidadán para que renuncie a facelo".

"Non satisfeitos con mentir e desinformar sobre os dereitos lingüísticos", explica Maceira, "os policías denunciaron a vítima por suposta alteración da seguridade e a delegación do goberno afonda na indefensión dos nosos dereitos lingüísticos, propondo unha sanción cualificada como grave cunha multa de 600€". Así, dende a Mesa pola Normalización censuran que a Delegación do Goberno avalou o informe emitido polos axentes, mostrando "a falta de neutralidade e de imparcialidade por parte da instrutora do procedemento, nomeada pola delegación do goberno español en Galiza".

A entidade, a través da Liña do Galego, xa se dirixiu á delegación do goberno, instándoa a suspender o procedemento contra o cidadán e abrir dilixencias contra os policías. A Mesa solicita tamén "que se forme os membros das forzas de seguranza nos dereitos lingüísticos da cidadanía para evitar que se repitan feitos como este".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 Carlos Xunqueira de Ambía

[IRONIC MODE ON] En Galiza hai unha clara discriminación e persecución do castelán [IRONIC MODE OFF]

1 Gamela

As Policías Municipais logo dos meses de Estado de Alarma Vitalicio colleron a sartén polo mango e agora non hai quen lles tusa ! En Vigo levan 19 meses facendo o que queren e cando queren... e todo o mundo cala e mira para outro lado, porque sabemos ben que a Subdelegada do Goberno en Pontevedra asina calquera cousa que lle poñan diante ! Estamos falando de Dereitos Fundamentais ! http://www.galiciaconfidencial.com/...