A Xunta vota en contra de sancións máis elevadas ás eléctricas por agresións ao ambiente

Pablo Arangüena (PSdeG) demandou á Xunta que impoña as sancións "máis elevadas" que proceda ante agresións a ríos e ecosistemas fluviais, como poida ser o baleirado de encoros. Unha proposta que foi rexeitada cos votos do PPdeG no pleno deste martes.

Xunto a isto, cargou contra o "nivel de falsidade" e "cinismo insoportable" de Núñez Feijóo e a conselleira de Medio Ambiente, Ángeles Vázquez, respecto ao baleirado de encoros galegos, nunha actuación que "roza a prevaricación".

Arangüena tamén avisou de que se a Xunta xa iniciou expedientes sancionadores por 25.000 euros a cada unha das eléctricas --con base na lei de pesca--, non poderá impor 2 millóns de euros --con base na lei de patrimonio natural-- en multas, dado que "non poden sancionarse polos mesmo feitos dúas veces", o que observa como un "exemplo de máxima incompetencia" do Goberno galego.

Nesta liña, Luís Bará (BNG) cargou contra a "incompetencia" da Xunta para resolver "grandes" problemas nos ríos galegos. Tamén afeou que o PP vetase unha comisión parlamentaria en Galicia sobre o sucedido nos encoros, xa que se pregunta que "se fixeron todo ben, que problema teñen en que se coñeza".

Pola súa banda, Marisol Díaz (PPdeG) respondeu a Arangüena que o "cinismo insoportable é o seu", posto que "esta cuestión xa non ten máis percorrido". Responsabilizou ao presidente da Confederación Miño-Sil, José Quiroga, do "salvaxe baleirado", mentres defende que a Xunta "actuou de forma rápida, contundente, e integral".

Vertido de posibles augas fecais ao río Miño en Ourense | Fonte: remitida