Galicia, segunda comunidade con menor incremento da mortalidade no ano 2020
Sobe nun 4'19%, só por detrás de Canarias, que rexistra un aumento do 4'19%.
Por Europa Press / Redacción | Compostela | 01/11/2021 | Actualizada ás 11:43
Galicia foi a segunda comunidade autónoma do Estado que rexistrou un menor incremento da mortalidade durante 2020, primeiro ano da pandemia. Así o reflicte un informe da Asociación Nacional de Servizos Funerarios (Panasef), que sitúa no 4,97% o aumento das defuncións na comunidade galega respecto das cifras de 2019.
Por contra, Madrid foi a comunidade autónoma española onde máis se incrementou a mortalidade o ano pasado, un 41% máis que en 2019, debido fundamentalmente á pandemia do Covid-19. En toda a rexión madrileña morreron o ano pasado 66.583, fronte ás 47.165 de 2019.
Así o fixo público a Asociación Nacional de Servizos Funerarios (Panasef), que con motivo do Día de Todos os Santos presentou un avance dos datos sectoriais tras unha crise sanitaria que tanto afectou a este negocio. A radiografía analiza os datos do ano 2020, nos que se produciron 492.930 defuncións en España, un 17,73% máis que no ano anterior, no que faleceron 417.625 persoas.
Pero a pandemia non afectou a todas as comunidades autónomas por igual. Os maiores incrementos de defuncións producíronse en Madrid, seguido de Castela-A Mancha (32,33%), Castela León (25,97%) e Cataluña (23,35%). As rexións que se viron en menor medida afectadas foron Canarias (4,19%), Galicia (4,97%), Murcia (5,78%) e Baleares (7,09%).
A media de falecidos en España en 2020 foi de 1.350 persoas ao día. Como contraste, durante os primeiros meses da pandemia a media de defuncións chegou a subir ata un 500% en cidades como na capital de España. En toda a rexión madrileña morreron o ano pasado 66.583, fronte ás 47.165 de 2019.
A data de 1 de xaneiro a cifra acumulada de falecidos pola pandemia na Comunidade de Madrid era de 19.515. Sanidade Mortuoria contabilizou 4.978 mortos en centros sociosanitarios, 13.337 en hospitais, 1.170 en domicilios e 30 noutros lugares. O Ministerio de Sanidade rebaixaba esa cifra a 11.828.
En números absolutos, o maior número de falecidos en 2020 (non só por coronavirus) rexistrouse, con 79.685, e en Andalucía, 78.160. Pero en Andalucía, a comunidade máis poboada de España, o aumento de mortalidade o ano pasado foi do 10,8%, a metade do rexistrado en Cataluña e case catro veces menos que o incremento de Madrid.
O SECTOR FUNERARIO, EN CIFRAS
En relación cos cemiterios, España conta con 17.682 cemiterios para 8.126 municipios e o 99% son de propiedade municipal. O sector funerario consta dunhas 1.100 empresas públicas e privadas, que facturaron durante o 2020, 1.700 millóns de euros. O número de tanatorios ou velorios mantense en 2.525 instalacións con 7.050 salas. Andalucía, Cataluña e Castela e León son as comunidades con maior número.
Ademais, España dispón de 487 fornos crematorios, fronte aos 464 do ano anterior, e sitúase nun dos países de Europa con maior número destas instalacións. As Comunidades Autónomas con maior censo de fornos crematorios son Andalucía (116), Valencia (54), Castela e León (53) e Madrid (48). Tamén resaltan os fortes investimentos das funerarias en filtros de emisións á atmosfera.
Esta tendencia prégaseaos hábitos funerarios dos españois, cun aumento das incineracións en torno ao 1% en 2020, tendencia reforzada pola pandemia. En 2020, as incineracións totais ascenderon á 45,54% fronte ao 54,46% de inhumacións. A porcentaxe de incineracións alcanza o 60% do total nas capitais de provincia, mentres que nas zonas rurais a súa incidencia é menor, un 39,8%.
En canto ás despedidas, aumenta o número de familias que optan polas cerimonias relixiosas, 86,4%, fronte ao 13,6% que prefiren unha cerimonia civil para despedir aos seus seres queridos. Un dato motivado posiblemente polo período de pandemia.
A Asociación Nacional de Servizos Funerarios aproveitou tamén o Día de Todos os Santos para render homenaxe ás vítimas da pandemia e aos falecidos durante este ano. Para iso, as empresas uníronse o venres a un minuto de silencio e a unha homenaxe floral para falecidos, familias e tamén profesionais do persoal funerario.
