O Concello da Coruña prepara a ordenanza de terrazas tras manter o seu uso en zonas de aparcadoiro
"Imos ordenar o espazo público existente", expuxo a alcaldesa Inés Rey, que sinalou que se fará con criterios de seguridade e de estética porque non valerá "calquera terraza".
Por E.P. | SANTIAGO DE COMPOSTELA | 09/11/2021 | Actualizada ás 16:17
A alcaldesa da Coruña, Inés Rey, confirmou que o goberno local ultima unha nova ordenanza de terrazas tras acordar permitir mantelas en zonas de aparcadoiro, unha medida que, polas restricións, decidiuse pola pandemia e que agora se estenderá no tempo.
Será, segundo expuxo a preguntas dos xornalistas tras asistir á inauguración dunha estatuta en homenaxe ao sanitarios, unha cesión "ordenada en base á seguridade e a estética".
"Imos ordenar o espazo público existente", expuxo a rexedora, que sinalou que se fará con criterios de seguridade e de estética porque non valerá "calquera terraza".
Noutra orde de cousas, e preguntada pola herdanza dun edificio valorado en máis de 13 millóns que reclama o Concello da Coruña en base ao testamento do seu propietario, dixo que o consistorio está a dar "os pasos legais oportunos para completar as disposicións testamentarias", pero aclarou que iso non afectará os residentes.
Mentres, cuestionada sobre os efectos da sentenza do Tribunal Constitucional que anula o cobro do imposto de plusvalía, dixo que están os servizos xurídicos e económicos municipais "traballando nas novas directrices" para adaptarse á legalidade. "Acataremos e axustarémonos á normativa legal".
