A Xunta cifra en 3,2 millóns a partida que permitiría aplicar na AP-53 as mesmas bonificacións que na AP-9

Unha partida de 3,2 millóns de euros permitirá aplicar na autoestrada Santiago-Dozón (a AP-53) as mesmas bonificacións que na AP-9, segundo o estudo realizado pola Xunta.

A conselleira de Infraestruturas, Ethel Vázquez, trasladouno aos medios de comunicación este venres despois de comunicarllo aos alcaldes dos municipios que transcorren por esta infraestrutura.

Esta reunión dá continuidade á celebrada a finais de outubro, na que o Goberno galego comprometeuse a realizar "un estudo completo e profesional" para calcular o custo da aplicación das mesmas bonificacións na AP-53 ás que ten a autoestrada do Atlántico (isto é, volta gratuíta nos desprazamentos que se realicen nunha pinza de 24 horas, un 20% adicional para vehículos lixeiros recorrentes e outro 20% para os vehículos pesados).

Un mes despois, a consellería presenta esta cifra, que ve "unha cantidade asumible por parte do Ministerio de Transportes" e da que destaca "que se traduciría en maior competitividade e seguridade viaria". Tamén os rexedores consideran "perfectamente asumible" a contía, que ven "a forma de corrixir un agravio comparativo" en relación cunha autoestrada das máis caras de España, en palabras do primeiro edil de Lalín, Xosé Crespo.

Pola súa banda, Ethel Vázquez incidiu en que, na actualidade, polo volume de tráfico, a AP-53 "non realiza a súa función vertebradora", situación que Xunta e concellos queren "reverter". En concreto, o resultado do seu estudo cifra nuns 3 millóns o custo das bonificacións para os vehículos lixeiros e nuns 200.000 euros para os vehículos pesados.

A modo de exemplo, a conselleira chamou a atención sobre os "beneficios importantes" que suporían estas rebaixas para un veciño de Lalín que vaia a Santiago todos os días, 25 veces ao mes, posto que aforraría 2.178 euros ao ano.

En nome dos alcaldes, Crespo agradeceu "a celeridade" da Xunta e subliñou que lles parece "de xustiza que como mínimo se apliquen as mesmas bonificacións" que na AP-9, tendo en conta que implicarían unha "razoable inxección por parte do ministerio, que tamén se vai a aforrar diñeiro en mantemento da nacional". "Creo que o ministerio debería considerar facer esta achega", resolveu.

A conselleira de Infraestruturas, Ethel Vázquez, reúnese co alcalde de Lalín e representantes dos concellos da traza da AP-53 para presentar o resultado do estudo sobre o custo das mesmas bonificacións que a AP-9. CONCHI PAZ | Fonte: Europa Press