Atacan á sede do BNG de Marín arrincando o logo do partido e os carteis colgados do balcón

O BNG de Marín denunciou este xoves un ataque contra a súa sede tras descubrir que foran arrincados da fachada a placa co logo do partido e os carteis colgados do balcón. A portavoz municipal do BNG en Marín, Lucía Santos Omil, asegurou que o ataque non foi "un acto improvisado" e que se trata de "un intento de limitar a súa acción política e de tentar infundir o medo entre a militancia".

O Bloque xa fixo a denuncia correspondente e lembrou, nun comunicado, que "non é o primeiro ataque que sofre a sede do BNG en Marín" e asegurou que nos últimos tempos tanto este espazo como os domicilios dalgúns membros do partido sufriron este tipo de incidentes.

Aínda que se descoñece ao autor ou autores do suceso, a formación nacionalista afirmou que os indicios apuntan a "un ataque procedente dos elementos da dereita máis rancia e españolista".

A portavoz municipal comentou que o que conseguen este tipo de accións é "autoafirmalos nos seus principios" e insistiu en que "ao contrario de quen pretende calalos, de forma covarde, continuarán traballando día a día e sempre dando a cara, de fronte e coa cabeza ben alta".

A sede do BNG en Marín (Pontevedra) sen a placa co logo do partido e a cartelaría que adoitaba colgar da súa fachada.. BNG | Fonte: Europa Press