Coren destina 4 millóns de quilos de castaña para alimentar os porcos da sua gama ‘selecta’
A cooperativa ourensá vén de pechar un convenio de compra coa empresa Alibós de Monterroso, a maior colleitadora do sector de Galicia, para abastecerse durante o 2022.
Por X.M. Fernández | Ourense | 16/12/2021 | Actualizada ás 11:53
O acordo de compra de 4.100.000 quilos de castaña foi ratificado días atrás polo presidente do grupo Coren, Manuel Gómez-Franqueira Álvarez, e Jesús Quintá, xerente de Alibós, principal empresa colleitadora e transformadora de castaña en Galicia na actualidade. Tal cantidade de quilos representa, segundo refiren na cooperativa, unha achega económica ao campo galego duns 6.350.000 euros.
A castaña adquirida integramente en Galicia pasa por un proceso de pelado, cocción e posterior conxelado para poder conservala co fin de destinar á alimentación dos seus porcos da gama ‘Selecta’ durante todo o ano.
Coren, un xigante no sector da alimentación, aposta por xerar riqueza no rural galego sendo a compra de castaña autóctona unha das accións que enmarcan na súa Política de Responsabilidade Social. A súa gran demanda deste produto busca tamén preservar e fomentar o aproveitamento dos soutos galegos pois, segundo estudos do sector, unha plantación de castiñeiros coidada e con variedades de valor engadido é un cultivo rendible.
