Entregados os Premios de Primavera das Letras a alumnos e profesores de centros de Marín, Lugo e Gondomar
O presidente da RAG, Víctor F. Freixanes, e a académica responsable do portal da RAG para os escolares de infantil e primaria, Fina Casalderrey, recibiron, na sede da institución, a unha representación dos colexios gañadores.
Por Europa Press / Redacción | A CORUÑA | 20/12/2021 | Actualizada ás 17:52
A Real Academia Galega (RAG) fixo entrega dos premios de Primavera ds Letras a alumnado e profesorado dos colexios de Carballal de Marín, Manuel Mallo Mallo de Lugo e Souto-Doas, Gondomar.
Trátase do concurso 'Contádenos o voso Día das Letras', convocado ao amparo do citado proxecto dixital, e que recoñece as creacións de estudantes galegos con motivo do Día das Letras Galegas.
O presidente da institución, Víctor F. Freixanes, e a académica responsable do portal da RAG para os escolares de infantil e primaria, Fina Casalderrey, recibiron, na sede da institución, a unha representación dos colexios gañadores.
Tamén participaron Amparo Castaño, Darío Gil Arias e Marcos Arias Castaño, nai, fillo e irmán de Xela Arias, á que se lle dedicou a última conmemoración das Letras Galegas.
Na súa intervención, o presidente da RAG reivindicou a importancia dos centros docentes nesta celebración. "E moito máis os de educación infantily primaria, nos que se asenta o primeiro coñecemento da nosa cultura", apuntou.
