(Vídeo) Benvido, mister AVE: Ourense parodia a chegada da alta velocidade nun vídeo cargado de crítica social
SOS Ourense reflexiona sobre os problemas de conectividade interior de Galicia e a emigración en ton humorístico ante a chegada do AVE a Ourense. O vídeo ten en poucas horas máis de 10.000 visualizacións.
Por Galicia Confidencial | OURENSE | 21/12/2021 | Actualizada ás 11:15
A chegada do AVE a Ourense deixou na xornada de onte moitas caras coñecidas da política estatal e galega pero tamén moita crítica social. A plataforma SOS Ourense vén de compartir un vídeo no que, con moita retranca, fai unha fonda crítica social sobre os problemas de conectividade interior en Galicia e reflexiona sobre a emigración da veciñanza, que parte na procura de traballo a Madrid.
O vídeo intercala imaxes do filme 'Benvido, Mister Marshall' e imaxes dalgunhas das marchas da plataforma SOS Ourense, na que se integran ducias de entidades. Baixo a descrición 'Imaxes a pé de rúa da cidadanía Ourensá dando a benvida ao Futuro. Todo Emoción. Gracias Feijóo, gracias Baltar, gracias Jácome!', o vídeo ten en poucas horas máis de 10.000 visualizacións.
