O BNG fará fronte común con ERC e Bildu contra a "decepcionante" reforma laboral
Reclama que se tramite como proxecto de lei para introducir maiores cambios que "un parche" que mantén os aspectos "máis lesivos".
Por Europa Press / Redacción | SANTIAGO DE COMPOSTELA | 03/01/2022 | Actualizada ás 12:52
O deputado do BNG no Congreso, Néstor Rego, informou de que o Bloque mantén contactos con formacións como ERC e Bildu para facer unha "fronte común" en contra da "decepcionante" reforma laboral, de forma que se reclama que se derrogue a lexislación aprobada polo PP, tal e como se comprometeu o Goberno de coalición.
En rolda de prensa conxunta en Santiago, a portavoz nacional do Bloque, Ana Pontón; o secretario xeral da CIG, Paulo Carril, e Néstor Rego coincidiron en mostrar o seu rexeitamento á modificación realizada da normativa laboral porque continúa cos aspectos "máis lesivos" aprobados no seu día na reforma do PP.
Así, critican que se mantén o abaratamento do despedimento, non se recupera a autorización previa da autoridade laboral para os ERE, hai unha prevalencia dos convenios de ámbito estatal, á vez que prevalece o convenio de empresa sobre o de sector (salvo no caso dos salarios).
Respecto diso, Ana Pontón esixe ao Goberno central que cumpra cos seus "compromisos", pois lembra que a derrogación da reforma laboral do PP era un dos seus "puntos centrais". De tal forma, apela a unha fronte común de forzas "nacionalistas, soberanistas e progresistas" para que "non sexa unha nova lexislatura perdida". E é que reprocha que o decreto aprobado polo Consello de Ministros, a finais de decembro, "non cumpre coa promesa de derrogación da reforma laboral do PP", o que considera unha "enorme decepción".
Pontón tacha de "moi grave" que o Goberno manteña o "despedimento barato" acordado polo Executivo de Mariano Rajoy, no que reduce a "un parche", dado que "un lavado de cara non soluciona os problemas estruturais neste ámbito". Por todo iso, pide "elevar o listón" na reforma.
Nesta liña, a portavoz nacional do Bloque lamenta a "oportunidade perdida" que achaca a "unha claudicación ante unha das parte, a patronal", así como a unha "claudicación aos intereses de Bruxelas" para que cheguen os fondos Next Generation, que "van acabar en mans de catro multinacionais".
RECLAMAN UN PROXECTO DE LEI
Así mesmo, Néstor Rego demanda que se tramite como proxecto de lei no canto de como decreto, de modo que haxa posibilidade dunha modificación "en positivo". Neste sentido, márcase o obxectivo de que "a presión social" leve ao Goberno a que "se vexa obrigado a derrogar realmente a reforma laboral".
De feito, apunta que é "paradoxal" que a dereita "fala ben" desta reforma laboral. Cita exemplos como "Aznar e FAES" que din que "non está mal porque preserva a maioría" dos cambios introducidos polo Partido Popular, mentres o vicepresidente da CEOE, Lorenzo Amor, asegurou que se mantén o "95 por cento" da reforma do PP. Por tal motivo, Rego avisa de que o BNG "non está disposto a asumir sen dar batalla" esta "decepción e nova frustración".
OS MOZOS SEGUIRÁN COMO "CARNE DE CANÓN"
Pola súa banda, o líder sindical da CIG, Paulo Carril, advirte de que, "pese ao envoltorio e propaganda", esta reforma laboral pivota sobre aspectos "claramente negativos" e "inxustos", pois non se toca un despedimento "case libre" e un marco de "permanente temporalidade e precariedade".
Pon de exemplo o feito de que prevaleza o convenio de empresa sobre o de sector. Así, en dúas empresas dun mesmo sector de actividade, os empregados deberán ter o mesmo salario, pero non as mesmas condicións, polo que nunha compañía poderase traballar "50 ou 60 horas máis respecto doutra".
Na "gran fraude" da normativa aprobada, Carril pon o foco acerca de que os mozos serán "carne de canón" da explotación laboral, pois tamén se lles suma o "cóctel molotov" da "falsa formación dual" para dar lugar a: precariedade, baixos salarios e peores condicións de traballo.
