Dinamarca, único país de Europa coa declaración obrigatoria para viaxeiros en Galicia

A Consellería de Sanidade reduciu de maneira significativa os territorios que os viaxeiros deben declarar de maneira obrigatoria ao Servizo Galego de Saúde (Sergas) antes da súa chegada a Galicia. Así, na listaxe de países de Europa que hai que notificar só figura Dinamarca.

Así figura a listaxe de destinos, actualizado este martes a través dunha orde da Consellería de Sanidade que recolle o Diario Oficial de Galicia (DOG).

Segundo a relación de territorios, dentro de España son de declaración obrigatoria todas as autonomías fóra de seis: as Illas Canarias e as Baleares, Comunidade Valenciana, Andalucía e Murcia, así como as cidades de Ceuta e Melilla. Na anterior actualización, só había dúas comunidades excluídas.

De América, a Xunta determina obrigatorio que comuniquen a súa entrada en territorio galego as persoas procedentes de Ecuador, Guatemala, Honduras, Nicaragua, O Salvador, Paraguai, Venezuela, Haití, Nicaragua e Xamaica.

De igual modo, entre os países de Asia figuran na listaxe Bangladesh, India, Irán, Iraq, Líbano, Palestina, Filipinas, Afganistán, Bután, Brunei, Cambodia, Indonesia, Laos, Mongolia, Myanmar, Nepal, Paquistán, Siria e Iemen.

Do resto do mundo, a orde do DOG contempla de declaración obrigatoria de todos os países de África, pero ningún de Oceanía.

Os viaxeiros que estivesen nalgún dos lugares da listaxe nos 14 días anteriores deben comunicar, nun prazo máximo de 24 horas, os seus datos de contacto e estancia en Galicia a través da web https://coronavirus.sergas.gal/viaxeiros ou do teléfono 881 00 20 21.

A Xunta lembra que esta resolución, que entrará en vigor este mércores, 12 de xaneiro, será obxecto de actualización nun prazo máximo de 15 días naturais.

Cola de facturación no Aeroporto de Santiago. Lavacolla. Turismo. Pasaxeiros en aeroportos.. EUROPA PRESS - Arquivo | Fonte: Europa Press