Investigados un médico e un psicólogo pola expedición de certificados psicotécnicos falsos

A Garda Civil investiga a tres persoas como presuntas autoras dun delito de falsidade documental, en relación coa expedición de certificados psicotécnicos falsos a condutores e a solicitantes de licenzas de armas desde un centro da provincia de Ourense.

Segundo informaron fontes do Instituto Armado, a investigación iniciouse o pasado mes de decembro, cando o Grupo de Investigación e Análise (GIAT) do subsector de Tráfico de Ourense, en colaboración coa xefatura provincial de Tráfico, detectou posibles irregularidades na expedición de certificados a determinados condutores para a obtención ou renovación do carné no centro As Cunchas, de Lobeira (Ourense).

As primeiras pescudas apuntaron que un condutor, ao que se tramitou unha renovación do permiso de conducir, obtería o certificado psicotécnico sen nin sequera terse personado no centro médico de recoñecemento, incumprindo os requisitos esixidos no RD 170/2010 polo que se rexe o regulamento deste tipo de centros. O centro, con todo, si expediu e cursou o documento co resultado de 'apto' á Xefatura de Tráfico.

Por estes feitos, a Benemérita investiga a tres persoas, entre as que están un médico e un psicólogo. As dilixencias foron postas en coñecemento do xulgado de instrución de Bande.

A Garda Civil explicou que a Agrupación de Tráfico "presta especial atención" a aqueles condutores que puidesen ter minguadas as súas condicións psicofísicas e alertan ás autoridades daqueles casos que poidan constituír un "perigo para a seguridade viaria". Así mesmo, tamén se controla o correcto funcionamento dos centros de recoñecemento de condutores.

Coche autopilatado, sen conductor, con conducción automática de Tesla | Fonte: autopista.es