Por Europa Press / Redacción | SANTIAGO DE COMPOSTELA | 12/02/2022 | Actualizada ás 20:23
O xefe superior de Policía Nacional en Galicia, José Luís Balseiro Vigo, faleceu este sábado nun hospital da Coruña, onde permanecía ingresado desde hai unha semana por complicacións dunha enfermidade diagnosticada hai un ano. Balseiro asumiu a xefatura da Policía Nacional na Comunidade galega o 18 de febreiro de 2020 tras o seu ascenso desde a Xefatura Rexional de Operacións en Galicia.
Nacido en San Sadurniño en 1960 e licenciado en Dereito, obtivo o seu primeiro destino en 1985 como inspector e desempeñou funcións de responsabilidade en distintas áreas policiais de Cataluña, Unidades de Intervención Policial en Galicia, así como na área de Seguridade Cidadá. No ano 2002, ascendeu á categoría de comisario e ocupou diferentes postos directivos en Canarias e Galicia. Tras iso, en 2016 pasou ao cargo de comisario principal e desenvolveu a súa actividade profesional como Xefe da Comisaría Provincial da Coruña, onde no ano 2017 é nomeado Xefe Rexional de Operacións, cargo que ocupaba ata a actualidade. Entre as súas distincións, destaca unha Cruz ao Mérito Policial con Distintivo Vermello e dúas Cruces ao Mérito policial con Distintivo Branco, entre outras.
CONDOLENCIAS
Tras coñecerse o deceso do responsable da Policía en Galicia, o presidente da Xunta, Alberto Núñez Feijóo, e o delegado do Goberno na Comunidade galega, José Miñones, mostraron o seu pesar pola perda de Balseiro.
"Recibo con tristeza a noticia do falecemento do comisario José Luís Balseiro Vigo, xefe superior da Policía Nacional en Galicia. O meu máis sentido pésame á súa familia e o recoñecemento para un servidor público que levaba 37 anos velando pola seguridade cidadá. DEP", publicou Núñez Feijóo --en castelán-- na súa conta de Twitter.
Pola súa banda, a Delegación do Goberno en Galicia emitiu un comunicado no que o seu titular, José Miñones, destaca a "excelente traxectoria profesional" de Balseiro durante as súas case 40 anos de servizo, nos que estivo "sempre comprometido co seu traballo ata o último momento". "Foi un exemplo de entrega e deixa un enorme legado profesional,[...] e un enorme baleiro persoal en todos nós", sinalou José Miñones, que expresa as súas condolencias a familia e achegados, especialmente á súa muller e fillos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.