Un de cada cinco empregos do sector cultural galego está en Santiago

Un de cada cinco empregos do sector cultural galego atópase en Santiago de Compostela, segundo as conclusións do Consello Económico e Social. O alcalde da capital, Xosé Sánchez Bugallo, foi o encargado de presentar este venres as conclusións dos grupos de traballo deste Consello e o documento de 'Actualización da análise da evolución da situación socioeconómica de Santiago de Compostela', así como o da 'Análise e diagnóstico da Axenda Urbana de Santiago'.

Sobre a análise da evolución socioeconómica da cidade, o rexedor destacou os datos relativos ao emprego cultural, que revelan que 1 de cada 5 empregos do ámbito da cultura en Galicia están en Santiago. Así mesmo, o estudo sitúa Santiago como o concello que máis gasto destina por habitante e ano do seu orzamento municipal a actividades e fomento cultural. "Máis de 100 euros por habitante e ano, en concreto 105,7", sinalou Bugallo.

AXENDA URBANA

O órgano municipal explicou que o pasado luns se entregou ás persoas integrantes do Consello Económico e Social o documento base de "Análise e diagnose da Axenda Urbana de Santiago", que compila a información precisa para iniciar o proceso de elaboración da Axenda Urbana 2030 de Santiago de Compostela e que contribuirá á implantación da Axenda Urbana Española.

Sobre este documento, o alcalde sinalou que "evidencia" o compromiso da institución "tanto coa propia Axenda Urbana Española, como coa Axenda urbana Europea e os Obxectivos de Desenvolvemento Sustentable (ODS) da Axenda 2030".

Por cada un dos obxectivos estratéxicos destas Axendas o Concello estableceu un ámbito de análise e diagnóstico, que permita evidenciar os principais retos e desafíos aos que se enfrontan e a partir dos que se deseñará a estratexia municipal, a súa visión, obxectivos estratéxicos, específicos e liñas de acción en consonancia coa Axenda Urbana Española.

A alcaldía asegurou que comeza agora, no marco deste proxecto, a fase de elaboración do Plan Estratéxico de Acción Local (PEAL) na que contarán coa colaboración da Universidade de Santiago de Compostela que asumirá a dirección executiva desta fase do proceso a través da profesora e doutora en Economía, María Cadaval, que traballará co catedrático de Economía Aplicada da Universidade de Vigo, Santiago Lago.